जळगाव शहरातील छत्रपती शिवाजीनगरमध्ये घटना
जळगाव (प्रतिनिधी) : शहरातील छत्रपती शिवाजीनगरमध्ये एका माथेफिरूने घरासमोर लावलेली रिक्षा पेटवून दिल्याची घटना घडली. याप्रकरणी जळगाव शहर पोलीस ठाण्यात अज्ञात व्यक्तीविरोधात गुन्हा दाखल करण्यात आला आहे.
अजय राजेंद्र जगताप (वय ३४, रा. लाकूडपेठ, छत्रपती शिवाजीनगर, जळगाव) हा तरुण रिक्षा चालवून उदरनिर्वाह करतो. त्यांच्याकडे राजू गणपत चौरे यांच्या मालकीची ऑटो रिक्षा क्रमांक (एमएच १९ सीडब्ल्यू ६३४८) घरासमोर लावलेली असतांना गुरुवारी ६ फेब्रुवारी रोजी मध्यरात्री १ वाजेच्या सुमारास अज्ञात माथेफिरू व्यक्तीने प्रवाशी रिक्षा पेटवून दिली. या आगीत रिक्षा जळून खाक झाली असून सुमारे अडीच लाख रुपयांचे नुकसान झाले. यासंदर्भात रिक्षा चालक अजय जगताप यांनी जळगाव शहर पोलिसात तक्रार दिली. त्यानुसार अज्ञात व्यक्तीविरोधात जळगाव शहर पोलीस ठाण्यात गुन्हा दाखल करण्यात आला आहे. या घटनेचा पुढील तपास पोलीस कॉन्स्टेबल ओमप्रकाश सोनी हे करत आहे.
