शिरसोली जवळ रस्त्यावरील घटना, नागरिकांमधून कारवाईबाबत समाधान
जळगाव (प्रतिनिधी) तालुक्यातील शिरसोली ते कुऱ्हाडदा रस्त्याच्या दरम्यान रात्री बेफाम वाळू वाहतूक चालते. या वाहतुकीविरोधात नागरिकांनी नाराजी व्यक्त केली होती. जिल्हाधिकाऱ्यांना याबाबत माहिती देताच त्यांनी तहसीलदारांना कारवाईच्या सूचना दिल्या. त्यानुसार सोमवारी २३ मार्च रोजी रात्री १० वाजता १ डंपरवर कारवाई करण्यात आली आहे. कारवाईत सातत्य रहावे अशी अपेक्षा ग्रामस्थांनी व्यक्त केली आहे.
शिरसोली ते कुऱ्हाडदा रस्त्यावर रात्री बेरात्री वाळू माफियांचे डंपर बेफामपणे धावत असतात. यामुळे ग्रामस्थांना रात्रीची झोपही व्यवस्थित लागत नाही. तसेच वाळू उपशामुळे नद्यांना खड्डे पडत चालले आहे. गौण खनिजाचे अवैध वाहतूक होत असल्याने महसूल देखील बुडत आहे. या सर्व बाबींकडे शिरसोली ग्रामस्थांनी जिल्हाधिकाऱ्यांचे लक्ष वेधून घेतले. जिल्हाधिकारी रोहन घुगे यांनी ग्रामस्थांच्या तक्रारीवर गांभीर्याने विचार करून रात्री तहसीलदारांना कारवाई करण्याबाबत सूचित केले.
सोमवारी रात्री १० वाजता झुलेलाल वॉटर पार्कजवळ एका अवैध वाळू वाहतूक करणाऱ्या डंपरला तहसीलदारांच्या पथकाने शिरसोली व वावडदा दरम्यान अडवले. त्याच्याकडे कुठल्याही प्रकारचे वाळू परवाना नसल्याने त्या डंपरवर कारवाई करण्यात येत असल्याची माहिती शासकीय अधिकाऱ्यांकडून मिळाली आहे. या कारवाईत नायब तहसीलदार राहुल वाघ, शिरसोली मंडळ अधिकारी सारीखा मॅडम, अजिंक्य आधळे, शिरसोली तलाठी मयुर महाले, म्हसावद तलाठी सुरेश चौधरी,व इतर कर्मचारी उपस्थित होते. दरम्यान या डंपरवर कारवाई झाल्याने नागरिक समाधान व्यक्त करत असून जिल्हाधिकाऱ्यांनी कारवाईमध्ये सातत्य कायम ठेवावे अशी अपेक्षा देखील व्यक्त केली आहे.
