जळगावातील वर्धमान शाळेजवळची घटना
जळगाव (प्रतिनिधी) :- शहरातील हरिविठ्ठल नगर भागातील रहिवाशी तरुणाचा बुधवारी रात्री २.३० वाजेच्या सुमारास वर्धमान शाळेजवळ रेल्वेच्या धक्क्याने मृत्यू झाल्याची घटना गुरुवारी सकाळी ६.३० वाजेच्या सुमारास उघडकीस आली. या प्रकरणी तालुका पोलीस स्टेशनमध्ये अकस्मात मृत्यूची नोंद करण्यात आली आहे.
गोपाल राजू भोई (वय.३२, रा. हरिविठ्ठल नगर, जळगाव) असे मयत तरुणाचे नाव आहे. गोपाल भोई हा दोन भाऊ व आईसमवेत वास्तव्यास होता. तसेच ठेकेदारीचा व्यवसाय करत होता. बुधवारी रात्री जेवण करून घराबाहेर निघाला होता. दरम्यान, गुरुवारी सकाळी ६.३० वाजेच्या सुमारास गोपालचा मृतदेह सावखेडा शिवारातील रेल्वेलाईनलगत आढळून आला. याबाबतची माहिती स्थानिक नागरिकांनी तालुका पोलीसांनी दिली. आधारकार्डव्दारे गोपालची ओळख कळली. याच ठिकाणी गोपालची दुचाकी देखील आढळून आली.
तालुका पोलिसांनी पंचनामा करून गोपालचा मृतदेह शासकीय वैद्यकीय महाविद्यालय व रुग्णालय येथे आणला. या घटनेची माहिती नातेवाईकांना मिळाल्यानंतर नातेवाईकांनी रुग्णालय परिसरात हंबरडा फोडला. गोपालच्या मित्रांकडून घात-पाताचा संशय उपस्थित करण्यात आला. दरम्यान, प्राथमिक तपास तालुका पोलीस स्टेशनचे अनिल फेगडे व अनिल मोरे यांनी केला. या प्रकरणी तालुका पोलीस स्टेशनमध्ये अकस्मात मृत्यूची नोंद करण्यात आली आहे.
