जळगाव शहरातील असोदा रेल्वेगेटजवळची घटना
जळगाव (प्रतिनिधी) : येथील कांचन नगर परिसरातील १६ वर्षीय तरुणीला रेल्वेचा धक्का लागल्याने तिचा दुर्दैवी मृत्यू झाल्याची धक्कादायक घटना सोमवारी दि. ०६ मे रोजी दुपारी ३ वाजेच्या सुमारास घडली आहे. याप्रकरणी जळगाव तालुका पोलीस स्टेशनला अकस्मात मृत्यूची नोंद करण्यात आली आहे.
कोमल संजय निंबाळकर (वय १६, रा. कांचन नगर, जळगाव) असे मयत तरुणीचे नाव आहे. ती आई, वडील, मोठा भाऊ यांच्यासह राहत होती. वडील संजय हे मोलमजुरी करून परिवाराचा उदरनिर्वाह करीत आहे. कोमल इयत्ता दहावीत शिकत होती. दरम्यान, सोमवारी दि. ६ मे रोजी कोमल हि घरातून निघून असोदा रेल्वेगेट येथे गेली होती. काही वेळाने रेल्वेचा धक्का लागल्याने तिचा मृत्यू झाल्याची घटना दुपारी ३ वाजता घडली आहे. दरम्यान, पोलिसांनी कोमलचा मृतदेह हा शासकीय वैद्यकीय महाविद्यालय व रुग्णालयात दाखल केला.
कुटुंबियांना माहिती मिळताच त्यांनी रुग्णालयात धाव घेतली. नातेवाईकांनी एकच आक्रोश केला. यावेळी कांचन नगर परिसरातील नागरिकांनी गर्दी केली होती. जळगाव तालुका पोलीस स्टेशनला अकस्मात मृत्यूची नोंद करण्यात आली आहे.
