रावेर-सावदा रोडवर घटना, तिघांविरुद्ध गुन्हा दाखल
रावेर (प्रतिनिधी) : रावेर-सावदा रस्त्यावरील पारश्या नाल्याजवळ एका ६५ वर्षीय किराणा व्यापाऱ्याला दुचाकीवर बसवून नेले आणि त्यानंतर त्यांच्याकडील रोख रक्कम जबरदस्तीने हिसकावून घेतल्याची धक्कादायक घटना उघडकीस आली आहे. या प्रकरणी रावेर पोलीस ठाण्यात अज्ञात तीन आरोपींविरुद्ध गुन्हा दाखल करण्यात आला आहे.
फिर्यादी गोवर्धनदास सफरमल कोटवानी (वय ६५, रा. स्टेशन रोड, रावेर) हे आपला किराणा व्यवसायाचे पैसे जमा करून परतत असताना ही घटना घडली. १८ फेब्रुवारी रोजी रात्री ९ वाजेच्या सुमारास एका अज्ञात इसमाने त्यांना आपल्या मोटरसायकलवर बसवले. काही अंतर गेल्यानंतर, पारश्या नाल्याजवळील एका शेताजवळ त्याचे इतर दोन साथीदार आधीच दबा धरून बसले होते. त्या ठिकाणी या तिघांनी मिळून कोटवानी यांच्याकडील किराणा मालाचे जमा केलेले एकूण १५,००० रुपये रोख जबरदस्तीने हिसकावून घेतले आणि अंधाराचा फायदा घेत तिथून पळ काढला.
या घटनेनंतर गोवर्धनदास कोटवानी यांनी १९ फेब्रुवारी रोजी सायंकाळी रावेर पोलीस ठाण्यात धाव घेऊन तक्रार नोंदवली. पोलिसांनी गुन्हा नोंदवला आहे. या गुन्ह्याचा पुढील तपास पोलीस उपनिरीक्षक सुनील मोरे हे करत आहेत. भररस्त्यात व्यापाऱ्याला लुटल्याच्या या घटनेमुळे रावेर परिसरातील व्यापाऱ्यांमध्ये चिंतेचे वातावरण पसरले आहे.
