अमळनेर शहरात पोलिसांची धडक कारवाई
अमळनेर (प्रतिनिधी) : चोरीची मालवाहतूक पिकअप गाडी अमळनेरात आणून विक्रीचा प्रयत्न करणाऱ्या मध्य प्रदेशातील चोरट्यांचा डाव अमळनेर पोलिसांनी उधळून त्यांच्या मुसक्या आवळल्या आहेत. याप्रकरणी मुद्देमाल जप्त करण्यात आला आहे.
अमळनेर पोलीस ठाण्यातील डीबी पथकास बुधवारी दि. १६ रोजी गस्तीदरम्यान गोपनीय माहिती मिळाली. मालवाहतुक करणारी पिकअप चोरीची असून ती अमळनेर शहरात विक्रीसाठी येत आहे.(केसीएन)पोलीस स्टेशनचे प्रभारी अधिकारी केदार बारबोले व पोलीस निरीक्षक दत्तात्रय निकम यांचे मार्गदर्शन व सूचनेप्रमाणे माऊली टी हाऊस, गलवाडे रोड येथे नाकाबंदी लावण्यात आली. नाकाबंदीदरम्यान ८ वाजेच्या सुमारास एक पांढऱ्या रंगाची पिकअप मालवाहतूक गाडी गलवाडे रोड कडून आली. तिला नाकाबंदी ठिकाणी थांबवण्यात आले असता तिच्यावर पुढील बाजूस (एमएच १८जी ३२२१) अशी नंबर प्लेट होती.
सदर पिकप मध्ये फिरोज खान अमित खान (वय २९ वर्ष, रा. आगार रोड, उज्जैन, मध्य प्रदेश) आणि दानिश शेख अब्दुल शकूर शेख (वय २३ वर्ष रा. साजापूर मोहल्ला, मोगलपुरा मशिद जवळ ता. जिल्हा साजापूर, मध्य प्रदेश) हे दोन संशयित बसले होते.त्यांना सदर वाहनाचे कागदपत्र व मालक कोण असल्याबाबत विचारपूस केली असता पोलिसांना उडवा उडवीची उत्तरे देऊ लागले.(केसीएन)त्यावरून संशय आल्याने सदर वाहन जप्ती व पंचनामा करून पोलीस स्टेशनला आणण्यात आले. वाहनाचे बारकाईने निरीक्षण करता चिटकवलेल्या नंबर प्लेटच्या खाली आणखी एक नंबर प्लेट होती. तिच्यावर (एमपी ४३ जी २१३२) असा क्रमांक होता. त्यावरून वाहनाचा मूळ मालकास संपर्क करून विचारपूस केले असता सदर वाहन हे रतलाम, मध्य प्रदेश येथील असल्याचे समजले आहे.
सदर वाहन हे दि. १२ एप्रिल रोजी रात्री बस स्टॅन्डच्या पाठीमागील भागातून चोरीस गेल्याचे वाहन मालक यांनी सांगितले. सदर बाबत स्टेशन रोड पोलीस स्टेशन रतलाम, मध्य प्रदेश येथे गुन्हाही दाखल करण्यात आलेला आहे. संशयित इसम हे सराईत असून त्यांची ओळख साजापूर कारागृहात झालेली आहे. दरम्यान दि. १७ रोजी रतलामचे पोलीस अधिकारी व तपासी अंमलदार यांचे पथक अमळनेर पोलीस स्टेशनला येऊन दाखल झाल्यानंतर सदर वाहन व संशयित इसम यांना त्यांच्या ताब्यात देण्यात आले. सदरची कारवाई अमळनेर पोलीस स्टेशनच्या पथकाने धडक कामगिरी निरीक्षक दत्तात्रय निकम यांच्या मार्गदर्शनाखाली करण्यात आली.
