जळगाव येथे एमआयडीसी पोलीस स्टेशनला गुन्हा दाखल
जळगाव (प्रतिनिधी):- जळगाव-पहुर रस्त्यावरून रॉयल फर्निचरकडे जाण्यासाठी रस्ता ओलांडत असताना ५४ वर्षीय प्रौढाला मालट्रकने धडक देवून पायावरून चाक नेत गंभीर जखमी केल्याची घटना २२ मे रोजी सकाळी १०.३० वाजेच्या सुमारास घडली. याप्रकरणी मंगळवारी मालट्रक चालकाविरूध्द एमआयडीसी पोलिसात गुन्ह्याची नोंद करण्यात आली आहे.
नागसेन नगरातील विजय सुधाकर सोनार हे २२ मे रोजी सकाळी १०.३० वाजेच्या सुमारास जळगाव-पहूर रस्त्यावरून रॉयल फर्निचरकडे जाण्यासाठी रस्ता ओलांडत होते. तेव्हा त्यांना मालट्रकने (क्रमांक एमएच ४१, एयू ५०८३) धडक दिली. नंतर ट्रकचे चाक सोनार यांच्या पायावरून गेल्याने त्यांना गंभीर दुखापत झाली. अखेर उपचार घेतल्यानंतर मंगळवारी त्यांनी पोलिस ठाण्यात येवून संपूर्ण हकिकत सांगितली. त्यानुसार मालट्रक चालकाविरूध्द गुन्ह्याची नोंद करण्यात आली आहे.
