जळगाव तालुक्यात पाळधी ते तरसोद दरम्यान घडली घटना
जळगाव (प्रतिनिधी) :- शहरापासून जवळ असलेल्या पाळधी ते तरसोद दरम्यानच्या नवीन राष्ट्रीय महामार्गावर बुधवारी दि. २७ ऑगस्ट रोजी दुपारी साडेचार वाजण्याच्या सुमारास दोन मालवाहू ट्रकची समोरासमोर धडक झाली. या भीषण अपघातात एका ट्रकचा चालक जागीच ठार झाला असून, इतर दोन जण गंभीर जखमी झाले आहेत. तर क्लीनर थोडक्यात बचावला आहे. पोलीस स्टेशनला घटनेची नोंद घेण्याचे काम सुरु होते.
या अपघातात टाइल्सने भरलेल्या ट्रकचा चालक जागीच ठार झाला. त्याच्यासोबत असलेला क्लिनर मात्र प्रसंगावधान राखून उडी मारल्याने बचावला, पण त्याला किरकोळ दुखापत झाली. दुसरीकडे, दगडी कोळशाने भरलेल्या ट्रकचे चालक आणि क्लिनर हे दोघेही गंभीर जखमी झाले आहेत. अपघातात दोन्ही ट्रकचा पुढील भाग पूर्णपणे चक्काचूर झाला. मृत चालकाचा मृतदेह ट्रकच्या केबिनमध्ये अडकल्याने त्याला बाहेर काढणे अवघड झाले. जेसीबी आणि क्रेनच्या मदतीने ट्रकचा भाग बाजूला करून मृतदेह बाहेर काढण्यात आला. अपघाताच्या वेळी (जीजे १६ एवाय ००७८) क्रमांकाच्या ट्रकमध्ये दगडी कोळसा भरलेला होता, तर (एपी ३९ यूएफ ३५९९) क्रमांकाच्या दुसऱ्या ट्रकमध्ये बांधकामासाठी लागणाऱ्या टाइल्स होत्या.
दोन्ही ट्रक कचरा फॅक्टरीजवळ एकमेकांवर आदळले. या जोरदार धडकेमुळे दगडी कोळशाने भरलेला ट्रक उलटला आणि दुसऱ्या ट्रकमधील टाइल्सचा ढिगही रस्त्यावर पसरला. अपघाताची माहिती मिळताच स्थानिकांनी आणि पोलिसांनी घटनास्थळी धाव घेतली. जखमींना तातडीने जवळच्या रुग्णालयात दाखल करण्यात आले आहे. या अपघातामुळे महामार्गावर काही काळ वाहतूक विस्कळीत झाली होती, मात्र पोलिसांच्या मदतीने वाहतूक पूर्ववत करण्यात आली. पोलिसांनी अपघाताची नोंद घेऊन पुढील तपास सुरू केला आहे.
