डॉ. खेवलकर अटक प्रकरणात न्यायालयामध्ये कामकाजावेळी घेतला सहभाग
पुणे (वृत्तसेवा) :- पुण्यातील ड्रग्स पार्टी प्रकरणात राष्ट्रवादी काँग्रेस शरद पवार गटाचे विधान परिषद आमदार एकनाथराव खडसे यांचे जावई तसेच महिला प्रदेशाध्यक्ष रोहिणी खडसे यांचे पती प्रांजल खेवलकर यांना अटक करण्यात आली आहे. याप्रकरणी आज त्यांच्या जामीनाबाबत सुनावणी पार पडली. दरम्यान, सुनावणीला सुरूवात होण्यापुर्वी पतीसाठी रोहिणी खडसे वकिली कोट घालून थेट न्यायालयात आल्याचे पाहायला मिळाले.
पुणे ड्रग्स पार्टी प्रकरणात प्रांजल खेवलकर सध्या पोलिसांच्या अटकेत असून या प्रकरणाची आज न्यायालयात सुनावणी सुरू झाली. आज दोन दिवसांची पोलीस कोठडी संपल्यानंतर खेवलकर यांना पुन्हा न्यायालयात हजर करण्यात आले. यावेळी पती प्रांजल यांची बाजू लढण्यासाठी रोहिणी खडसे या स्वत: वकील म्हणून न्यायालयात कोट घालून वकील म्हणून हजर राहिल्या. दरम्यान, खटल्याची सुनावणी संपल्यानंतर, प्रकरण न्यायप्रविष्ठ आहे. मी योग्य वेळी बोलेन, अशी प्रतिक्रिया रोहिणी खडसे यांनी माध्यमांसमोर बोलताना दिली.
न्यायालयात सरकारी वकील आणि आरोपींच्या वकिलांनी जोरदार युक्तिवाद केला असून प्रांजल खेवलकर यांच्यासह सात आरोपींना जामीन मिळणार का? की त्यांच्या पोलीस कोठडीत वाढ होणार याबाबत लवकरच न्यायालयाचा निकाल येण्याची शक्यता आहे. रोहिणी खडसे यांच्यासोबत जळगाव येथील कार्यकर्ते अजय बढे, रिंकू चौधरी, अशोक लाडवंजारी, सुनील माळी आदी दिसून आले.
