जळगाव ( प्रतिनिधी ) – स्व. डॉ. सच्चीदानंद मुनगंटीवार मेमोरियल महाराष्ट्र मिनी स्टेट सिलेक्शन बॅडमिंटन स्पर्धा- 2025 ही चंद्रपूर येथे आयोजित करण्यात आली होती. दि.10 ते 14 सप्टेंबर दरम्यान झालेल्या राज्यस्तरीय बॅडमिंटन स्पर्धेत ओवी पाटील चाळीसगाव (जळगाव) व श्रद्धा इंगळे (कराड) या दोघींनी 13 वर्षा खालील दुहेरी गटात विजय प्राप्त केला. त्यांनी सेमी फायनल मध्ये हेजल जोशी व स्पृहा जोशी मुंबई उपनगर या खेळाडूंना 21-15 व 21-14 ने हरवत अंतिम सामन्यासाठी आपली जागा निश्चित केली.
अंतिम सामन्यामध्ये मायरा गोराडिया व कनक जलानी मुंबई यांचा 21-14 व 21-15 सरळ दोन सेट मध्ये पराभव करत विजय नोंदवला. त्यांना सुवर्णपदक, ट्रॉफी, रोख रक्कम व प्रावीण्य प्रमाणपत्र देऊन गौरविण्यात आले. ओवी चे वडील अमोल पाटील हे चाळीसगाव येथील काकासाहेब पूर्णपात्रे शाळेत क्रिडा शिक्षक असून तेच तिचे प्रशिक्षक आहेत. ओवी पाटील व अमोल पाटील यांच्या भावी वाटचालीसाठी जळगाव जिल्हा बॅडमिंटन असोसिएशनचे अध्यक्ष अतुल जैन व सचिव विनीत जोशी, जैन स्पोर्ट्स अकॅडमी चे क्रीडा समन्वयक अरविंद देशपांडे व प्रशिक्षक किशोर सिंह यांनी शुभेच्छा दिल्या. दरम्यान जळगाव रेल्वे स्टेशनवर जैन स्पोर्ट्स अकॅडमीच्या प्रशिक्षक दीपिका ठाकूर यांच्या सह महिला खेळाडूंनी ओवी चा सत्कार केला.
फोटो ओळ – विजयी झालेल्या श्रद्धा इंगळे व ओवी पाटील यांच्या सोबत (डावीकडून) प्रशिक्षक अमोल पाटील, राष्ट्रीय प्रशिक्षक एस. आर. विष्णू , राष्ट्रीय खेळाडू अरुंधती पंतावणे, जैन स्पोर्ट्स अकॅडमीचे प्रशिक्षक किशोर सिंह.
