आ. रोहित पवार यांचा मंत्री गिरीश महाजन यांच्यावर हल्लाबोल
जामनेर मतदार संघात झाली राष्ट्रवादी शरद पवार गटाची जाहीर सभा
जामनेर (प्रतिनिधी) : येथील विधानसभा मतदारसंघाचे महाविकास आघाडीचे उमेदवार दिलीप खोडपे सर यांच्या प्रचारासाठी स्टार प्रचारक आ. रोहित पवार यांची शेंदुर्णी येथे जाहीर सभा घेण्यात आली. ज्यांना त्यांच्याच मतदारसंघात चिखलात रस्ते तुडवीत जावे लागते, ते काय जनतेसाठी विकास कामे करतील ? असा सवाल यावेळी आमदार रोहित पवार यांनी जनतेला विचारला.
विधानसभा निवडणुकीचे पडघम आता जोरात वाजत आहेत. प्रचारासाठी अवघे ११ दिवस शिल्लक आहेत. जामनेर येथे राष्ट्रवादी काँग्रेस पक्ष शरद पवार गटाचे उमेदवार दिलीप खोडपे सर यांच्या प्रचारासाठी आ. रोहित पवार यांची जाहीर सभा घेण्यात आली. सभेमध्ये आ. रोहित पवार यांनी, आता बदल हवा असेल तर दिलीप खोडपे सर यांच्याशिवाय तुम्हाला पर्याय नाही. महाविकास आघाडी केवळ विकास कामे करणार असे सांगत नाही तर कृती देखील करते.
भाजपचे मंत्री केवळ मोठ्या गोष्टी करतात मात्र प्रत्यक्षात जनता आजही विकासापासून कोसो दूर आहे अशा शब्दात त्यांनी भाजपच्या कार्यपद्धतीचा खरपूस समाचार घेतला. सभेमध्ये उज्वलाताई गरुड काशीद यांनी राष्ट्रवादी काँग्रेस पार्टी शरदचंद्रजी पवार या पक्षामध्ये प्रवेश केला.
यावेळी उद्योजक श्रीराम दयाराम पाटील, प्रवीण गरुड, उज्वलाताई काशीद, महिला जिल्हाध्यक्ष वंदनाताई चौधरी, हिरालाल राठोड, ओंकार नायक, जिल्हा कार्याध्यक्ष शालिग्राम मालकर, शिवसेना उद्धव बाळासाहेब ठाकरे गटाचे तालुकाध्यक्ष ज्ञानेश्वर बोरसे,पारस ललवाणी, दिगंबर पाटील, डॉ. मनोहर पाटील, राजू बोहरा, प्रशांत पाटील, शंकर राजपूत यांच्यासह महाविकास आघाडीतील सर्व घटक पक्षांचे पदाधिकारी कार्यकर्ते महिलावर्ग मोठ्या संख्येने उपस्थित होता.
