जळगाव तालुक्यातील वसंतवाडी येथील दुर्दैवी घटना
जळगाव (प्रतिनिधी) : घरात लग्न समारंभनिमित्त आनंदाचे वातावरण असताना अचानक शोककळा पसरली आहे. पुतणीच्या लग्नात नाचताना काकाला अचानक हृदयविकाराचा झटका आला आणि त्यातच त्याचा मृत्यू झाल्याची धक्कादायक घटना जळगाव तालुक्यातील वसंतवाडी येथे उघडकीस आली आहे. यामुळे लग्नघरी दुःखाचे वातावरण पसरले असून एमआयडीसी पोलीस स्टेशनला घटनेची नोंद घेण्याचे काम सुरू होते.
गुलाब बाबूलाल पवार (वय २८, रा. चाळीसगाव) असे मयत तरुणाचे नाव आहे. तो चाळीसगावात परिवारासह राहत होता. मिस्त्री काम करून कुटुंबीयांचा उदरनिर्वाह करीत होता. तालुक्यातील वसंतवाडी येथे त्याच्या पुतणीचे बुधवार दि.८ मे रोजी लग्न होते. त्यानिमित्त तो वसंतवाडी येथे आलेला होता. मंगळवारी दि. ७ मे रोजी रात्री नऊ वाजेच्या सुमारास हळदीच्या कार्यक्रमात नाचगाण्याचा कार्यक्रम सुरू होता. त्यावेळेला काही नातेवाईकांनी गुलाब पवार याला खांद्यावर घेऊन नाचले.
त्यानंतर नाचत असताना अचानक गुलाब पवार याला जोरदार चक्कर येऊन तो कोसळला. त्याला नातेवाईकांनी तात्काळ शासकीय वैद्यकीय महाविद्यालय व रुग्णालयात उपचारासाठी आणले असता वैद्यकीय अधिकारी डॉ. रेणुका भंगाळे यांनी तपासून त्याला मयत घोषित केले. यानंतर कुटुंबीयांनी एकच आक्रोश केला. दरम्यान, लग्नघरावर तरुण काकाच्या मृत्यूमुळे मोठी शोककळा पसरली असून या दुर्दैवी घटनेबद्दल हळहळ व्यक्त करण्यात येत आहे. एमआयडीसी पोलीस स्टेशनला घटनेची नोंद घेण्याचे काम सुरू होते.
