मुक्ताईनगरच्या युवकावर मलकापूर तालुक्यात प्राणघातक हल्ला
मुक्ताईनगर (प्रतिनिधी) : तालुक्यातील पिंप्राळा येथील तरुणाची पूर्ववैमनस्यातून बुलडाणा जिल्ह्यातील मलकापूर शहरातील धोपेश्वर परिसरात सोमवारी चाकूहल्ला होऊन निर्घृण हत्या झाली. सायंकाळी दोन गटांमध्ये झालेल्या तुंबळ हाणामारीत आणखी एक तरुण गंभीर जखमी झाला आहे. याप्रकरणी मलकापूर येथे गुन्हा दाखल करण्यात आला असून ४ संशयित आरोपीना ताब्यात घेण्यात आले आहे.
सतीश गजानन झाल्टे (वय २१, रा. पिंप्राळा, ता. मुक्ताईनगर) असे मयत तरुणाचे नाव आहे. या हल्ल्यात त्याचा सहकारी अविनाश जितेंद्र झाल्टे (वय २३) हा गंभीर जखमी झाला आहे. त्याच्यावर जळगाव येथे रुग्णालयात उपचार सुरू आहेत. मृत सतीश आणि जखमी अविनाश यांचा काही दिवसांपूर्वी मलकापूर येथील काही तरुणांशी धोंगर्डी फाट्यावर वाद झाला होता. सोमवारी सायंकाळी हे दोन्ही तरुण धोपेश्वर मंदिराजवळ एका हॉटेलमध्ये चहा घेत असताना, याच वादातील मलकापूरचे संशयित आरोपी त्या ठिकाणी आले. जुन्या वादावरून त्यांच्यात पुन्हा शाब्दिक चकमक झाली आणि याचे रूपांतर हाणामारी व चाकूहल्ल्यात झाले.
चाकूहल्ल्यात सतीश झाल्टे गंभीर जखमी झाला. त्याला तातडीने मलकापूर उपजिल्हा रुग्णालयात दाखल करण्यात आले, मात्र उपचारादरम्यान त्याचा मृत्यू झाला. या घटनेमुळे परिसरातील नागरिक संतप्त झाले आणि त्यांनी हल्लेखोरांपैकी काहींना पकडून बेदम मारहाण केली. घटनेची माहिती मिळताच एमआयडीसी पोलिस ठाण्याचे निरीक्षक हेमराज कोळी यांच्या मार्गदर्शनाखाली पथकाने तातडीने घटनास्थळी धाव घेऊन परिस्थिती नियंत्रणात आणली आणि मारहाण झालेल्या चार आरोपींना ताब्यात घेतले.
पोलिसांनी ताब्यात घेतलेल्या आरोपींमध्ये देवा तिलकसिंह राजपूत (वय २४, रा. सावजी फेळ), संकेत सुनील उन्हाळे (वय २१), साहिल सुधाकर पालवे (वय १८) आणि अरविंद अजय साळुंखे (वय १९) यांचा समावेश आहे. कायदा-सुव्यवस्थेचा प्रश्न निर्माण होऊ नये यासाठी शहरात मोठा पोलीस बंदोबस्त वाढवण्यात आला असून, पोलीस अधिक तपास करत आहेत.
