भडगाव (प्रतिनिधी) – भडगाव तालुक्यातील वाडे येथे विद्यालयात रात्री एका प्रेमी युगलाने गळफास घेऊन आत्महत्या केल्याची धक्कादायक घटना घडली असून यामुळे परिसरात एकच खळबळ उडाली आहे.
भडगाव तालुक्यातील वाडे येथे माध्यमिक विद्यालयात रात्री एका मुलाने व एका मुलीने गळफास घेतल्याची घटना घडली आहे. याबाबत प्राथमिक माहितीनुसार हे प्रेमी युगल असून आपल्या विवाहाला समाज मान्यता मिळणार नाही याच्या भितीपोटी त्यांनी हे टोकाचे पाऊल उचलल्याचे बोलले जात आहे. माध्यमिक विद्यालयातील पहिल्या मजल्यावर जिन्यावर जाऊन गळफास घेत त्यांनी आपली जीवनयात्रा संपविली. आज सकाळच्या सुमारास हा धक्कादायक प्रकार उघड झाला.
याची माहिती मिळताच परिसरातील ग्रामस्थांसह भडगाव पोलीस स्थानकाच्या कर्मचार्यांनी घटनास्थळी धाव घेतली. तेव्हा यातील मुलगा हा मुकेश कैलास सोनवणे (वय २२, रा. वाडे, ता. भडगाव) व मुलगी ही नेहा बापू ठाकरे (वय १९, रा. वाडे) हे दोन्ही एकाच समाजाचे असल्याचे समजते. या दोन्ही जणांचे मृतदेह खाली उतरवून शव विच्छेदनासाठी पाठविण्यात आला आहे.
तर, या प्रकरणी पोलीस पाटील अरविंद फकीरा पाटील यांच्या खबरीवरून मयत मुकेश कैलास सोनवणे (वय २२) नेहा बापू ठाकरे वय १९ यांच्या विरूध्द गुन्हा नोंदविण्यात आला असून पुढील तपास पीएसआय सुशील सोनवणे हे करीत आहेत.
