ताप्तीगंगा एक्स्प्रेसमध्ये घडली घटना, पतीचा आक्रोश
जळगाव (प्रतिनिधी) :- पतीसोबत मूळ गावी जात असतांना रेल्वेतून प्रवास करीत असताना गर्भवती महिलेची अचानक प्रकृती बिघडली. त्यात प्रसूतीपूर्व वेदना असह्य झाल्याने जळगाव येथील रुग्णालयात दाखल केले असता उपचारादरम्यान तिचा मृत्यू झाला. लोहमार्ग पोलीस ठाणे, भुसावळ येथे घटनेची नोंद करण्यात आली आहे. गुरुवारी दि. १४ ऑगस्ट रोजी दुपारी ही घटना घडली.
नितूकुमारी चंदनकुमार सरोज (वय २७, मवैय जि. मिर्झापूर,उ.प्र.) असे मृत विवाहितेचे नाव आहे. महिलेचे पाटील चंदनकुमार सरोज तसेच त्यांच्या पत्नी नितूकुमारी सरोज हे दाम्पत्य सुरत येथून ताप्ती एक्सप्रेसमध्ये एस ७ बर्थ नं. ९ व १० ने प्रवास करत होते. ते उत्तरप्रदेशात मूळ गावी जात होते. नितूकुमारी या गर्भवती होत्या.(केसीएन)प्रवास करत असताना जळगावजवळ त्यांना प्रसूतीकळा होऊन त्यांची प्रकृती अत्यवस्थ झाली. जळगाव रेल्वे स्टेशनवर रेल्वे आल्यानंतर चंदन सरोज यांनी पोलिसांना माहिती दिली. त्यानुसार लोहमार्ग पोलीस ठाण्यातील कर्मचा-यांनी धाव घेत सरोज दाम्पत्याला तत्काळ रेल्वेतून उतरवित दुपारी ३.१५ वाजेच्या सुमारास शासकीय वैद्यकीय महाविद्यालय व रुग्णालयात हलविले.
तपासणीअंती डॉक्टरांनी नितूकुमारी यांना मृत घोषीत केले. ही घटना कळाल्यानंतर तिचे चंदनकुमार यांनी एकच आक्रोश केला. पोलिसांनी त्यांना धीर दिला. लोहमार्ग पोलीस ठाण्याचे पीएसआय राजेंद्र पाटील, पीएसआय अनिंद्र नगराळे, हवालदार हेमंतकुमार नरवाडे, कॉन्स्टेबल किरण बारी यांनी याकामी तत्परतेने मदत कार्य केले. दरम्यान, घटनेची लोहमार्ग पोलीस स्टेशन, भुसावळ येथे नोंद करण्यात आली आहे.
