जळगाव शहरातील घटना
जळगाव (प्रतिनिधी) : फैजपूर येथील खाजगी रुग्णालयामध्ये सिझर प्रसूती झाल्यानंतर तरुण विवाहितेची प्रकृती खालावली. त्यानंतर गेल्या ९ दिवसांपासून उपचार सुरू असताना विवाहितेचा मृत्यू झाल्याची घटना बुधवार दि. १२ मार्च रोजी सकाळी साडेअकरा वाजता घडली आहे. याप्रकरणी जिल्हा पेठ पोलीस स्टेशनला नोंद घेण्याचे काम सुरू होते.
अर्चना कुमार पाटील (वय २६) असे मयत विवाहितेचे नाव आहे. ती पती, एक मुलगा यांचेसह राहत होती. दि. ४ मार्च रोजी सदर विवाहितेला प्रसुतीसाठी फैजपूर येथील एका खाजगी रुग्णालयांमध्ये दाखल करण्यात आले होते.(केसीएन)तेथे सिजर होऊन महिलेला गोंडस मुलगा झाला. मात्र महिलेची प्रकृती बिघडली. किडनीचा आजार आणि न्यूमोनिया सदृश्य आजार असल्याचे वैद्यकीय पथकाने सांगितले. प्रकृती अधिकच खालावल्याने सोमवारी जळगाव येथील खाजगी रुग्णालयामध्ये सदर विवाहितेला उपचारासाठी हलवण्यात आले होते.
जळगावात उपचार सुरू असताना बुधवारी सकाळी साडेअकरा वाजेच्या सुमारास सदर तरुण विवाहितेची प्राणज्योत मालविली. (केसीएन)यावेळी कुटुंबीयांनी मन हेलावणारा आक्रोश केला. दरम्यान पुढील कार्यवाहीसाठी सदर विवाहितेचा मृतदेह हा शासकीय वैद्यकीय महाविद्यालय व रुग्णालयात आणण्यात आला होता. घटनेची जिल्हा पेठ पोलीस स्टेशनला नोंद घेण्यात आली आहे. तरुण विवाहितेच्या प्रसुतीपश्चात मृत्यूमुळे एकच खळबळ उडाली आहे.
