पित्याने दिली फिर्याद, कुटुंबियांचा शासकीय रुग्णालयात आक्रोश ; जळगाव रामानंदनगर पोलिसांत गुन्हा दाखल
जळगाव (प्रतिनिधी) – शहरातील देवकर फार्मसी कॉलेजच्या प्राचार्यांच्या त्रासाला कंटाळून २० वर्षीय विद्यार्थ्याने गळफास घेऊन आत्महत्या केल्याची धक्कादायक घटना उघडकीस आली आहे. याप्रकरणी रामानंद नगर पोलीस ठाण्यात कॉलेजच्या प्राचार्यांविरुद्ध गुन्हा दाखल करण्यात आला आहे.
मृत विद्यार्थी श्याम प्रभाकर पाटील (वय २०) हा जळगाव येथील श्री. गुलाबराव देवकर कॉलेज ऑफ फार्मसीमध्ये शिक्षण घेत होता. गेल्या काही दिवसांपूर्वी कॉलेजचे प्राचार्य योगेश पवार यांनी त्याला विनाकारण त्रास देत असल्याचे आणि वारंवार अपमानित करत असल्याचे श्यामने आपल्या कुटुंबियांना सांगितले होते. १४ फेब्रुवारी रोजी संध्याकाळी श्यामने आपल्या वडिल व काकानां फोन करून सांगितले की, “प्राचार्य योगेश पवार यांनी मला माझा दोष नसताना मला पाईप ने मारहाण केली. ज्यांचा दोष आहे त्यांना काहीच बोलले नाही” वडिल व काकांनी त्याची समजूत काढली मात्र प्राचार्यांच्या त्रासामुळे श्याम प्रचंड मानसिक दडपणाखाली होता.
शनिवार, १५ फेब्रुवारी रोजी श्यामने दौलत नगर येथील रुमवर गळफास घेऊन आपली जीवनयात्रा संपवली. पोलिसांनी घटनास्थळावरून एक सुसाईड नोट (चिठ्ठी) जप्त केली आहे. या चिठ्ठीत त्याने प्राचार्य योगेश पवार यांच्या मारहाणीमुळे जिवन संपवत असल्याचे स्पष्ट उल्लेख केला असून, त्यांच्यामुळेच आपण हे टोकाचे पाऊल उचलत असल्याचे नमूद केले आहे. मृत श्यामचे वडील प्रभाकर गोपाळ पाटील (रा. मु.बोदवड, ता. मुक्ताईनगर जि. जळगाव) यांच्या फिर्यादीवरून रामानंद नगर पोलिसांनी प्राचार्य योगेश पवार यांच्या विरोधात आत्महत्येस प्रवृत्त केल्याप्रकरणी गुन्हा नोंदवला आहे.
या प्रकरणाचा पुढील तपास सहाय्यक पोलीस निरीक्षक संदीप पाटील करत आहेत. या घटनेमुळे शैक्षणिक क्षेत्रात मोठी खळबळजनक उडाली असून विद्यार्थ्यांच्या मानसिक आरोग्याचा आणि कॉलेजमधील शिस्तीच्या नावाखाली होणाऱ्या छळाचा प्रश्न पुन्हा ऐरणीवर आला आहे.
“माझा मुलगा अभ्यासात हुशार होता, पण प्राचार्यांनी त्याला इतके मानसिक त्रास दिले की त्याला आत्महत्येचा मार्ग स्वीकारावा लागला. दोषींवर कडक कारवाई व्हावी,” अशी मागणी श्यामच्या वडिलांनी केली आहे.
