पुणे ( प्रतिनिधी ) – वाहतूक पोलिसाला कारच्या बोनेटवर लटकवत तब्बल 800 फुट फरफटत नेले. ही घटना मुंढवा रोड खराडी बायपासवर घडली. कार मालकाला त्याच्यावर असलेला 400 रुपयांचा दंड भरण्यास सांगितले होते मुंढवा पोलीस ठाण्यात कार चालकाविरुध्द खूनाच्या प्रयत्नाचा गुन्हा दाखल करण्यात आला आहे.
प्रशांत श्रीधर कांतावर ( 43,रा.हडपसर) असे अटक आरोपीचे नाव आहे. पोलीस हवालदार शेषराव जायभाय यांनी तक्रार दिली होती.फिर्यादी जायभाय हे सहायक पोलीस निरीक्षक राजगुरु यांच्या मार्गदर्शनाखाली चौकामध्ये वाहनांच्या पुर्वीच्या ऑनलाईन खटल्यांच्या दंडाची रक्कम वसूल करण्याची कारवाई करत होते.
प्रशांत कांतावार आय 20 कार घेऊन आले. त्यांना थांबवण्यात आले , त्यांना पुर्वीची 400 रुपये दंडाची रक्कम भरण्यास सांगण्यात आले. त्याने जोरजोरात हॉर्न वाजवत ‘एक ही पोलीस ढंग का नही, पैसे कमाने के लिए खडे हो क्या असे म्हणत गाडी दामटण्याचा प्रयत्न केला. यावेळी जायभार यांनी त्यांना थांबवण्याचा प्रयत्न केला असता, ते गाडीच्या बोनेटवर ढकलले गेले. ते गाडीच्या बोनेटवर लटकत असताना सुध्दा 800 मीटर अंतरावर घेऊन गेले. जायभाय यांच्या हाताच्या बोटास व कोपरास दुखापत झाली. तपास पोलीस उपनिरीक्षक भोसले करत आहेत.
