चाळीसगाव शहर पोलिसांनी केला तपास, न्यायालयाकडून कोठडीत रवानगी
चाळीसगाव प्रतिनिधी चाळीसगाव शहराचे माजी नगरसेवक प्रभाकर चौधरी यांच्यावर २६ ऑगस्ट रोजी कोयत्याने प्राणघातक हल्ला झाला होता. या गंभीर घटनेनंतर चाळीसगाव शहर पोलिसांनी तात्काळ तपास सुरू केला. पोलिसांनी या प्रकरणातील प्रमुख आरोपी सोमा उर्फ सागर चौधरी याच्यासह हरीश उर्फ सनी पाटील आणि गौरव उर्फ सोनू चौधरी अशा तिघांना सापळा रचून अटक केली आहे. त्यांची रविवारी सकाळी शहरात धिंड काढण्यात आली.
ज्या पद्धतीने आरोपींनी भरदिवसा माजी नगरसेवकावर हल्ला करून शहरात दहशत निर्माण केली होती, ती कमी करण्यासाठी पोलिसांनी एक कठोर पाऊल उचलले. रविवार, ३१ ऑगस्ट रोजी सकाळी ११ वाजता पोलिसांनी अटक केलेल्या या तिन्ही आरोपींची शहरातून पायी धिंड काढली. पोलिसांनी काढलेल्या या धिंडीमुळे आरोपींना चांगलीच अद्दल घडली असून, त्यांच्यातील दहशत संपुष्टात आणण्याचा प्रयत्न केला गेला. ही कारवाई पाहण्यासाठी रस्त्यावर नागरिकांची मोठी गर्दी जमली होती.
आरोपींची धिंड काढल्यानंतर त्यांना स्थानिक न्यायालयात हजर करण्यात आले. न्यायालयाने या तिन्ही आरोपींना पुढील तपासासाठी सात दिवसांची पोलीस कोठडी सुनावली आहे. या कोठडीत पोलीस या हल्ल्यामागील नेमके कारण, इतर आरोपींचा सहभाग आणि वापरलेली शस्त्रे याबाबत सखोल चौकशी करतील.
