आ. मंगेश चव्हाण यांच्या विकास कामाचा आदर्श पॅटर्न
चाळीसगाव (प्रतिनिधी) :- आपले शहर,गाव, तालुका सुरक्षित ठेवण्यासाठी, कायदा सुव्यवस्था अबाधित ठेवण्यासाठी पोलीस प्रशासन अहोरात्र परिश्रम घेत असते. मात्र पोलीस प्रशासनाला अपेक्षित असणाऱ्या सोयी– सुविधा उपलब्ध करून देण्यासाठी लोकप्रतिनिधींचा पुढाकार मिळाला तर काय बदल होऊ शकतो याचे एक चांगले उदाहरण चाळीसगाव शहरात घडले आहे. पोलीस चौक्यांचे स्वातंत्र्य दिनाला भूमिपूजन आणि ५ महिन्यातच प्रजासत्ताक दिनाला लोकार्पण पार पडले आहे.
जळगाव जिल्ह्यातील एक महत्वाचे तसेच छत्रपती संभाजीनगर, धुळे, नाशिक या तीन जिल्ह्यांच्या सीमेवरील चाळीसगाव शहर हे दळणवळणाचे मोठे केंद्र आहे. त्यामुळे साहजिकच शहराच्या सुरक्षा पाहणाऱ्या पोलिसांची जबाबदारी देखील वाढते. मात्र चाळीसगाव शहरात पोलिसांना गस्तीसाठी व नागरिकांना तात्काळ मदतीसाठी असणाऱ्या नागद चौफुली व रेल्वे स्टेशन जवळील पोलीस चौक्या मोडकळीस आल्याने काही वर्षांपासून बंद होत्या. त्यामुळे पोलिसांसह नागरिकांची देखील मोठी गैरसोय होत होती. ही बाब चाळीसगाव मतदारसंघाचे आ. मंगेश चव्हाण यांच्या लक्षात येताच त्यांनी नागद चौफुली व रेल्वे स्टेशन जवळील जुन्या पोलीस चौक्यांचे नूतनीकरण करण्याचा निर्णय घेतला तसेच चाळीसगाव शहराचे जकात नाके असणारे खरजई नाका व करगाव रेल्वे बोगदा येथे सुसज्ज अश्या दोन नवीन पोलीस चौक्या आमदार निधीतून बांधकाम करण्याचा संकल्प केला.
गेल्या स्वातंत्र्य दिनी म्हणजे १५ ऑगस्ट २०२३ रोजी या ४ पोलीस चौक्यांचे बांधकाम व नूतनीकरण कामाचे भूमिपूजन आ. मंगेश चव्हाण व जिल्ह्याचे पोलीस अधिक्षक एम.राजकुमार यांच्याहस्ते करण्यात आले होते. अवघ्या ५ महिन्यात या चारही पोलीस चौक्यांचे काम पूर्ण करून प्रजासत्ताक दिनाच्या दोनच दिवसानंतर दि.२८ जानेवारी रोजी आमदार मंगेश चव्हाण व मान्यवरांच्या हस्ते लोकार्पण करण्यात आले. त्यामुळे चाळीसगाव वासियांना आता पोलिसांचे चारही बाजुंनी सुरक्षा कवच मिळणार आहे. अतिरिक्त पोलीस अधिक्षक अशोक नकाते, उपविभागीय पोलीस अधिकारी अभयसिंग देशमुख, शहर पोलीस निरीक्षक संदीप पाटील, कृषी उत्पन्न बाजार समिती उपसभापती साहेबराव राठोड, देवयानी ठाकरे, जेष्ठ नेते वसंतराव चंदात्रे, उद्धवराव महाजन, राजेंद्र चौधरी, रविंद्र पाटील, संजय भा. पाटील, संजय पाटील, भाजपा शहराध्यक्ष नितीन पाटील आदी मोठ्या संख्येने उपस्थित होते.
*काय काय सुविधा असणार आहेत या पोलीस चौक्यांमध्ये ?*
चारही बीटच्या पोलीस चौक्यांमध्ये एक पीएसआय, एक अमलदार व बीट अंतर्गत जबाबदारी असणारे पोलीस कर्मचारी यांना बैठक व्यवस्था, सुसज्ज स्वच्छतागृह असणार आहे, संपूर्ण पोलीस चौकी पीओपी केली असून प्रशस्त दरवाजे खिडक्या असल्याने हवा खेळती राहणार आहे. यासोबतच चौकीला मार्बल व ग्रेनाईट टाईल्स, लाईट फिटिंग देखील अत्याधुनिक पद्धतीची बसविण्यात आली आहे. सोबत टेबल, खुर्च्या, फॅन आदी व्यवस्था असणार आहे. सदर चौक्या उभारणीची जबाबदारी हि ठेकेदार भूषण पाटील यांना देण्यात आली होती.
*बीटनिहाय हे अधिकारी व कर्मचारी असतील कर्तव्यावर*
घाट रोड बीट पोलीस चौकी – पीएसआय ढिकले व सुभाष पाटील अमलदार
रेल्वे स्टेशन बीट पोलीस चौकी – पीएसआय टकले व अमलदार दत्ता महाजन
खरजई बीट पोलीस चौकी (करगाव बोगदा) – पीएसआय बिरारी व अमलदार मालचे
पातोंडा बीट पोलीस चौकी (खरजई नाका) – पीएसआय आव्हाड व अमलदार पंकज पाटील
