लग्नाच्या कार्यक्रमातून परतताना दुचाकींच्या भीषण अपघातात पित्यासह दोन ठार, दोन चिमुकले जखमी

जळगाव  (प्रतिनिधी) :- जामनेर तालुक्यातील टाकळी गावाजवळ दोन दुचाकींची समोरासमोर भीषण धडक झाली. या अपघातात दोन दुचाकीस्वाराचा जागीच मृत्यू झाला तर दोन चिमुकले जखमी झाल्याची घटना शनिवारी १० मे रोजी दुपारी ४ वाजेच्या सुमारास घडली आहे. शासकीय वैद्यकीय महाविद्यालयात मृतदेह शवविच्छेदनासाठी पोहोचताच नातेवाईकांनी मन हेलावणारे आक्रोश केले. जखमींवर उपचार सुरू आहे.

राहूल रामदास सुरसे (वय-३० रा. चिखली ता. बुलढाणा) आणि सुनिल सुरेश पवार (वय ३५, रा.धोबीवराड ता.जळगाव) असे मयत झालेल्या दोन्ही दुचाकीस्वारांची नावे आहेत. सुनिल पवार हा कुटुंबासह शनिवारी १० मे रोजी बोदवड तालुक्यातील एका गावात नातेवाईकांकडे लग्नासाठी गेला होता.(केसीएन)लग्न आटोपल्यानंतर दुपारी ४ वाजता सुनिल पवार हा मुलगा कार्तीक सुनिल पवार (वय-६) आणि पिया सुनिल पवार (वय-८) या दोघा मुलांना सोबत घेवून बोदवड-जामनेर रस्त्याने वराड गावाकडे दुचाकीने निघाला होता. रस्त्यावरील टाकळी गावाजवळ समोरून येणाऱ्या दुचाकीने त्यांच्या दुचाकीला जोरदार धडक दिली.

या धडकेत सुनिल पवार आणि राहूल सुरशे हे जागीच ठार झाले तर सुनिलची दोन्ही मुले कार्तीक पवार आणि पिया पवार हे जखमी झाले. दरम्यान ही घटना घडल्यानंतर रस्त्यावरील वाहनचालकांच्या मदतीने दोन्ही मृतदेह आणि दोन्ही जखमी मुलांना जळगाव येथील शासकीय वैद्यकीय महाविद्यालयात दाखल करण्यात आले. मयतांच्या नातेवाईकांनी शासकीय वैद्यकीय महाविद्यालयात मन हेलावणारा आक्रोश केला.(केसीएन)याबाबत जळगाव तालुका पोलीस ठाण्यात प्राथमिक अकस्मात मृत्यूची नोंद करण्यात आली असून तपास सहाय्यक फौजदार संजय महाजन आणि पोलीस कॉन्स्टेबल योगेश माळी हे करीत आहे.