एरंडोल ( प्रतिनिधी ) – ठाणे महापालिकेच्या सहाय्यक आयुक्त कल्पिता पिंपळे आणि त्यांच्या अंगरक्षकावर झालेल्या हल्ल्याचा एरंडोल नगरपरिषदेतील अधिकारी आणि कर्मचाऱ्यांच्या संघटनांनी निषेध करून कठोर कारवाईची मागणी केली आहे.
ठाण्यात ३० ऑगस्टरोजी ठाणे महापालिकेच्या सहाय्यक आयुक्त कल्पिता पिंपळे व काही सहकारी माजीवाडा प्रभागात सायंकाळी अतिक्रमण विरोधी पथक घेऊन अनाधिकृत हातगाड्यांवर कारवाई करत असताना तेथील गुन्हेगारी प्रवृत्तीचे हातगाडी फेरीवाले अमरजीत यादव यांनी त्यांच्यावर व अंगरक्षक सोमनाथ पालवे यांच्यावर तीक्ष्ण हत्याराने हल्ला करून या दोघांनाही गंभीर दुखापत केली
या हल्ल्यात सहाय्यक आयुक्त श्रीमती कल्पिता पिंपळे यांच्या डाव्या हाताची दोन बोटे पुर्णपणे तुटून रस्त्यावर पडली व उजव्या हाताला अंगठ्यासह गंभीर दुखापत झाली आहे. त्यांच्या डोक्यावर खोल मार लागला आहे.अंगरक्षक सोमनाथ पालवे याच्या डाव्या हाताचे एक बोट पुर्णपणे तुटून पडले. हा हल्ला अतिशय गंभीर असून निंदनीय आहे.
एका महिला अधिका-यावर असा हल्ला होणे नक्कीच अत्यंत चिंताजनक आहे. आम्ही महाराष्ट्र राज्य नगरपरीषद संवर्ग अधिकारी संघटना ( शाखा एरंडोल ) व भारतीय मजदूर संघ (शाखा एरंडोल )यांच्या वतीने या गुन्हेगारी कृत्याचा जाहीर निषेध करत आहोत.निषेध नोंदविणेसाठी जिल्हाधिकारी कार्यालय , पोलिस अधीक्षक कार्यालय , उपविभागीय अधिकारी एरंडोल ,तहसीलदार एरंडोल तसेच पोलिस निरीक्षक यांना काम बंद आंदोलनाचे निवेदन या संघटनांकडून देण्यात आले. निवेदन देण्यासाठी मुख्याधिकारी विकास नवाळे , हितेश जोगी (कार्यालय अधीक्षक), युनियनचे अध्यक्ष सुरेश दाभाडे, विकास पंचबुधे, सचिव दिपक गोसावी , विनोदकुमार पाटील , डॉ. योगेश सुकटे , डॉ. अजित भट , शरद राजपूत , विक्रम घुगे , अशोक मोरे , किशोर महाजन , प्रकाश सूर्यवंशी , एस. आर. ठाकुर , आर टी महाजन , वैभव पाटील , आनंद झांबरे , कैलास देशमुख , तुषार शिंपी , आशिष परदेशी , लक्ष्मण पाटील , भूषण महाजन उपस्थित होते. अटक केलेल्या गुन्हेगारावर शीघ्र गतीने खटला चालवून कठोरात कठोर शिक्षा होण्यासाठी शासनाकडून विशेष प्रयत्न व्हावेत, अशी मागणी यावेळी करण्यात आली.
