जिल्ह्याच्या शैक्षणिक क्षेत्रात खळबळ
जळगाव (प्रतिनिधी) – एरंडोल शहरातील महात्मा फुले विद्यालयाच्या मुख्याध्यापकासह संस्थाध्यक्ष, कनिष्ठ लिपिकास ७५ हजार रुपये लाच स्वीकारताना लाचलुचपत प्रतिबंधक विभागाच्या पथकाने ताब्यात घेऊन अटक केली आहे. यामुळे एरंडोलसह जिल्ह्यातील शैक्षणिक क्षेत्रात खळबळ उडाली आहे.
यातील तक्रारदार हे सावता माळी शिक्षण प्रसारक मंडळ,जळगाव संचलीत महात्मा फुले हायस्कुल, एरंडोल येथे उपशिक्षक या पदावर कार्यरत आहेत. सदर संस्थेने तक्रारदार यांची व त्यांचे उप शिक्षक या पदावर कार्यरत असलेले सहकारी मित्र अशा दोघांची बदली दि.०१ एप्रिल रोजी एरंडोल हायस्कूल येथून महात्मा फुले हायस्कुल,धरणगाव येथे करण्यात आल्या बाबतचा मंजुरीसाठीचा प्रस्ताव दि.०२ मे रोजी रोजी शिक्षणाधिकारी, माध्यमिक शिक्षण विभाग,जिल्हा परिषद जळगाव यांचे कडे पाठविलेला होता. सदर तक्रारदार यांची व त्यांचे सहकारी उप शिक्षक मित्र अशा दोघांची बदलीस स्थगिती मिळणेसाठी व पाठवलेला मंजुरी प्रस्ताव रद्द करण्यात यावा अशा आशयाचे संस्थेचे पत्र शिक्षणाधिकारी यांचे नावे देण्याच्या मोबदल्यात मुख्याध्यापक विनोद शंकर जाधव (वय ४२, रा. योगेश्वर नगर, पारोळा) आणि कनिष्ठ लिपिक नरेंद्र उत्तम वाघ (वय ४४, रा. समर्थ नगर, भडगाव) यांनी तक्रारदार व त्यांच्या सहकारी उप शिक्षक यांचेकडे ७५ हजार रुपयाची एक पगाराची लाच मागितली.
हि लाच पंचासमक्ष दोघांनी संस्थाध्यक्ष विजय पंढरीनाथ महाजन (वय-५६ वर्ष, रा.माळी वाडा, एरंडोल) यांच्यासाठी दोघांचा पुर्ण महिन्याचा एक पगार म्हणजेच तक्रारदार यांना ७५,०००/-रुपये चेक स्वरूपाने घेणार असल्याचे सांगितले. संशयित विजय महाजन यांनी संशयित लिपिक नरेंद्र वाघ यांच्या मोबाईल फोनवरून तक्रारदार यांना रकमेची पूर्तता करण्यास सांगून प्राप्त करण्याचा प्रयत्न करून प्रोत्साहन दिले. मागणी केल्याप्रमाणे ७५ हजार रुपयांचा मुख्याध्यापक यांचे नावे असलेला चेक महात्मा फुले हायस्कुल, एरंडोल येथे स्वतः स्विकारतांना संशयित मुख्याध्यापकांना रंगेहाथ पकडण्यात आले आहे. त्यांचेवर एरंडोल पोलीस स्टेशन येथे गुन्हा दाखल करण्यात आला आहे.
