पाचोरा तालुक्यातील परधाडे रेल्वे स्टेशनजवळची घटना
जळगाव (प्रतिनिधी) : पाचोरा तालुक्यातील परधाडे रेल्वे स्टेशन जवळ एका परिवाराने रेल्वेखाली उडी घेऊन आत्महत्या केल्याची धक्कादायक घटना सोमवारी दिनांक ५ मे रोजी रात्री १० वाजता उघडकीस आली आहे. याप्रकरणी पाचोरा पोलीस स्टेशनचे अधिकारी व कर्मचारी तपास करीत असून ओळख पटविण्याचे आवाहन त्यांनी केले आहे.
पाचोरा शहर ते परधाडे रेल्वे स्टेशनच्या दरम्यान सोमवार दि. ५ मे रोजी रात्री १० वाजेच्या या सुमारास पुरुष, महिला आणि ४ वर्षीय मुलगा यांचा मृतदेह खंबा क्रमांक ३७६/१९ जवळ आढळून आला. याबाबतची माहिती रेल्वे विभागाच्या कर्मचाऱ्यांनी पाचोरा पोलिसांना दिली.(केसीएन)यानंतर पोलिसांनी सदरच्या मृतदेह स्थानिक नागरिकांच्या मदतीने पाचोरा ग्रामीण रुग्णालयामध्ये हलविले. यामध्ये पूर्ण परिवाराचा समावेश असल्याचे प्रथमदर्शनी दिसून आले आहे. तर या कुटुंबाने आत्महत्या नेमकी का केली व त्यांची ओळख पटवण्याचे आवाहन आता पोलिसांकडून केले जात आहे. पाचोरा पोलीस स्टेशनचे सहाय्यक पोलीस निरीक्षक दिनेश भदाणे, उपनिरीक्षक योगेश गणगे, हेड कॉन्स्टेबल राहुल शिंपी, मनोहर पाटील, अशोक हटकर, समाधान भोसले आदी कर्मचाऱ्यांनी घटनास्थळी धाव घेऊन पंचनामा केला. या घटनेमुळे जळगाव जिल्ह्यात एकच खळबळ उडाली आहे.
