औरंगाबाद ( प्रतिनिधी ) – फुलंब्री तालुक्यातील कविटखेडा येथील 24 वर्षीय तरुणाने सोशल मीडियावर पोस्ट टाकत आत्महत्या केली तो बजाज ऑटो कंपनीचे व्हेंडर नील ऑटो प्रायव्हेट लिमिटेडमध्ये कामाला होता. मॅनेजरने पगारवाढ आणि बढती देतो असं सागून त्याच्याकडून 80 हजार रुपये उकळले होते. आरोपी मॅनेजरने दोन वर्षांपासून पैसे घेऊनही पगारवाढीसह बढती दिली नाही.
व्याजाने कर्ज काढून हे पैसे मॅनेजरला दिलेले असल्याने तो आर्थिक विवंचनेत सापडला होता. हवालदिल झालेल्या तरुणाने शनिवारी आयुष्याचा शेवट केला. शिवनाथ सखाराम कोलते असं आत्महत्या करणाऱ्या तरुणाचं नाव आहे.
तो औरंगाबाद येथील नील ऑटो प्रा. लि. कंपनीत काही वर्षांपासून काम करत होता. मॅनेजर मनोज पवार याने शिवनाथला प्रमोशन आणि पगारवाढ देण्याचं आमिष दाखवलं. त्यासाठी आरोपीनं शिवनाथकडे 80 हजार रुपयांची मागणी केली. प्रमोशन आणि पगारवाढीच्या आमिषाला बळी पडून शिवनाथनं व्याजाने कर्ज घेऊन 80 हजार रुपये आरोपी मॅनेजरला दिले.
दोन वर्षे उलटूनही मॅनेजरने पगारवाढ दिली नाही. कर्जाने घेतलेल्या 80 हजार रुपयांचं व्याज दिवसेंदिवस वाढत होतं. देणेकऱ्यांकडून पैशांसाठी तगादा लावण्यात येत होता. यामुळे शिवनाथ आर्थिक विवंचनेत होता.
शिवनाथने सोशल मीडियावर पोस्ट लिहून शनिवारी सकाळी विहिरीत उडी घेऊन आत्महत्या केली . आत्महत्येपूर्वी लिहिलेल्या पोस्टमध्ये शिवनाथने म्हटलं की, ‘माझ्या आत्महत्येसाठी कंपनीतील मॅनेजर मनोज पवार हे कारणीभूत असतील. ते मला दोन वर्षांपासून पगारवाढ आणि प्रमोशनचं आश्वासन देत होते.’ शिवनाथने आत्महत्या केल्याची माहिती समोर येताच, कंपनीतील अन्य कर्मचाऱ्यांनी मॅनेजर विरोधात संताप व्यक्त केला आहे. आरोपीवर कारवाई होणार नाही, तोपर्यंत मृतदेह ताब्यात घेणार नाही, असा पवित्रा कंपनीतील कामगार संघटनेनं घेतला कामगारांनी काही काळ रास्ता रोकोदेखील केला. आरोपी मॅनेजर मनोज पवार फरार असून पोलीस त्याचा तपास करत आहेत.
