जळगाव (प्रतिनिधी ) – ऍक्टीव्हाच्या हस्तांतरणासाठी लाच मागणार्‍या उप प्रादेशीक परिवहन कार्यालयातील पंटरच्याविरोधात तक्रारदाराच्या फिर्यादीवरून रामानंदनगर पोलीस स्थानकात गुन्हा दाखल करण्यात आलेला आहे. या लाचखोरीत आरटीओ कार्यालयातील कर्मचार्‍यांचा सहभाग असण्याची शक्यता असून संशयितांची संख्या वाढू शकते.
तक्रारदार वाहन मालकांकडून ऑथॅरिटी लेटर घेऊन वाहनांच्या हस्तांतरणाचे काम करत आहे. ऍक्टीव्हाच्या हस्तांतरणासाठी ते आरटीओ कार्यालयात ६ ऑक्टोबररोजी आले होते.कार्यालयातील पंटर प्रशांत उर्फ पप्पू भोळे याने त्यांना स्वाक्षरीसाठी तीनशे रूपये आणि कार्यालयीन खर्च दिल्यानंतरच काम होईल असे सांगितले. यामुळे तक्रारदाराने नाशिक येथील लाचलुचपत प्रतिबंधक खात्याचे निरिक्षक साळुंखे यांची भेट घेऊन त्यांच्याकडे तक्रार सांगितली.
यानंतर ११ ऑक्टोबर रोजी एसीबीच्या कर्मचार्‍यांनी तक्रार नोंदवून घेत प्रशांत भोळे याच्याविरोधात सापळा रचला. मात्र त्याला सुगावा लागल्यामुळे त्याने रक्कम घेतली नाही. मात्र तीनशेऐवजी दोनशे रूपयांची डिमांड केली. दोनशे रूपयांमध्ये कोण वाटेकरी असतील ते सांगितले. ते व्हाईस रेकॉर्डरमध्ये रेकॉर्ड करण्यात आले. दुसर्‍या दिवशी तक्रारदाराने पुन्हा लाच देण्याचा प्रयत्न केला तेंव्हाही त्या व्यक्तीने लाच घेतली नाही. लाचेची मागणी करण्यात आल्याने आज तक्रारदाराने रामानंदनगर पोलीस स्थानक गाठून फिर्याद दिली.
प्रशांत भोळे, (रा. जे.के. मोटार ड्रायव्हींग स्कूल, जामनेर रोड, भुसावळ) याच्याविरूध्द गुन्हा दाखल केला आहे. यात उपप्रादेशिक परिवहन कार्यालयातील अधिकारी व कर्मचार्‍यांचा संबंध असल्याची तक्रार तक्रारदाराने नोंदविली असून चौकशीतून काय निष्पन्न होणार याकडे लक्ष लागून आहे.
