जळगाव ( प्रतिनिधी ) – होणाऱ्या पतीने हिणवल्याने गळफास घेऊन आत्महत्या करणाऱ्या भुसावळ तालुक्यातील कुर्हे (पानाचे) येथील रामेश्वरी नागपुरे-बारी हिला न्याय मिळण्याची आशा आता वाढली आहे तिचा होणारा पती भूषण पाटील-बारीवर तिला आत्महत्येस प्रवृत्त केल्याचा भा द वि कलम 306 प्रमाणे गुन्हा दाखल करण्यात आला आहे.
साखरपुडा झाल्यानंतर रामेश्वरी रवींद्र नागपुरे हिला होणारा पती भूषण ज्ञानेश्वर पाटील बारी (रा.रावेर, ह. मु. नाशिक) याने वेळोवेळी मानसिक त्रास दिला, तु जाड, गावंढळ असून मला नापसंद आहे, मी हे लग्न मोडणार आहे, अशाप्रकारे दमदाटी केली. 24 मार्चला रात्री अशी धमकी भूषणने दिली. हा प्रकार असह्य झाल्याने रामेश्वरीने 25 मार्च रोजी घरात गळफास घेऊन आत्महत्या केली. दोषी भूषणवर कारवाईसाठी बारी समाजाच्या शिष्टमंडळाने पालकमंत्री गुलाबराव पाटील व पोलीस अधीक्षक मुंडे यांची भेट घेतली व रामेश्वरीला हिणवून आत्महत्येस प्रवृत्त करणाऱ्या भूषणवर कारवाई करण्याची मागणी केली होती. निवेदनाच्या प्रती मुख्यमंत्री उद्धव ठाकरे, गृहमंत्री दिलीप वळसे-पाटील, विरोधी पक्ष नेते देवेंद्र फडणवीस, पालकमंत्री गुलाबराव पाटील, राज्य महिला आयोगाच्या अध्यक्ष रूपाली चाकणकर, माजी पालकमंत्री एकनाथराव खडसे, जिल्हाधिकारी, जिल्हा महिला आयोग व भुसावळ डीवायएसपी वाकचौरे यांना देण्यात आल्या होत्या. अखेर भुसावळ तालुका पोलिसांनी आज मयत रामेश्वरी हिचे वडील रवींद्र तापीराम नागपुरे यांनी दिलेल्या फिर्यादीवरून आरोपी भूषण वर कलम 306 प्रमाणे होणारी पत्नी रामेश्वरी हिला आत्महत्येस प्रवृत्त केल्याचा गुन्हा दाखल केला आहे.
