जळगाव शहरातील खंडेराव नगर परिसरातील घटना
जळगाव प्रतिनिधी – येथील खंडेराव नगर परिसरातील रेल्वे पुलाजवळ एका प्रौढाचा मृतदेह रविवारी दि. १५ फेब्रुवारी रोजी सकाळी आढळून आला आहे. दरम्यान सदर व्यक्ती हा दोन दिवसापासून बाहेरगावी होता आणि आज सकाळी त्याचा मृतदेह सापडला. त्यामुळे हा घातपात असू शकतो असा संशय नातेवाईकांना आहे.
अमर वसंत सपकाळे (वय ४४, रा. खंडेराव नगर, जळगाव) असे मयत व्यक्तीचे नाव आहे. त्याच्या पश्चात आई-वडील, पत्नी, एक मुलगा, एक मुलगी असा परिवार आहे. इस्त्री काम करून ते परिवाराचा उदरनिर्वाह करीत होते. दरम्यान गेल्या दोन दिवसांपासून ते बाहेरगावी असल्याची माहिती नातेवाईकांकडून मिळाली. रविवारी सकाळी ७ ते ८ वाजेच्या सुमारास त्यांचा मृतदेह खंडेराव नगर येथील रेल्वे पुलाजवळ आढळला. रामानंदनगर पोलीस स्टेशनला माहिती मिळताच कर्मचाऱ्यांनी घटनास्थळी धाव घेतली.
सदर मृतदेह शासकीय वैद्यकीय महाविद्यालय व रुग्णालयात शवविच्छेदनासाठी दाखल करण्यात आला आहे. रुग्णालयामध्ये अमर सपकाळे यांच्या नातेवाईकांनी एकच आक्रोश केला. रामानंदनगर पोलीस स्टेशनच्या कर्मचाऱ्यांनी तपासाला सुरुवात केली असून घटनास्थळी स्थानिक गुन्हे अन्वेषण शाखेच्या कर्मचाऱ्यांनी भेट देऊन पाहणी केली आहे. घटनेप्रकरणी रामानंदनगर पोलीस स्टेशनला अकस्मात मृत्यूची नोंद घेण्यात आली आहे
