रायगड (वृत्तसंस्था) – मोजक्‍या शिवभक्‍तांच्या उत्साहात दुर्गराज रायगडावर साजरा झालेला सोहळा ऐतिहासिक ठरला. करोनाच्या पार्श्‍वभूमीवर शिवराज्याभिषेक सोहळा साधेपणाने साजरा झाला. अखिल भारतीय शिवराज्याभिषेक महोत्सव समितीचे मार्गदर्शक खासदार युवराज संभाजीराजे छत्रपती व यौवराज शहाजीराजे छत्रपती यांच्या हस्ते मेघडंबरीतील छत्रपती शिवाजी महाराज यांच्या पुतळ्यास सुवर्ण नाण्यांचा अभिषेक घालण्यात आला.
छत्रपती शिवाजी महाराज की जय, जय जिजाऊ जय शिवराय, जय भवानी, जय जिजाऊ जय शिवाजी या जयघोषाने गड दणाणून गेला. आज सकाळी दाट धुक्‍यात सोहळ्याला सुरुवात झाली. यौवराज शहाजीराजे यांच्या हस्ते नगारखान्यासमोर ध्वजवंदन झाल्यानंतर युवराज संभाजीराजे व शहाजीराजे शिवरायांची उत्सवमूर्ती घेऊन राजसदरेकडे रवाना झाले. यावेळी शिवरायांच्या अखंड जयघोषात राजदरबार दणाणून गेला. राजसदरेवर उत्सव मूर्तीचे पूजन झाल्यानंतर मेघडंबरीतील शिवरायांच्या पुतळ्यास सुवर्ण नाण्यांचा अभिषेक घालण्यात आला.
संभाजीराजे म्हणाले, रायगड जिल्ह्याला करोनासह निसर्ग चक्रीवादळाचा फटका बसला आहे. या जिल्ह्यासाठी मुख्यमंत्र्यांनी विशेष पॅकेज जाहीर करावे. रायगड किल्ला परिसर गावातील नागरिकांना आरोग्य सुविधा उपलब्ध होण्यासाठी प्राथमिक आरोग्य केंद्र उभारले जाईल. करोनाच्या प्रादुर्भावामुळे देशाची आर्थिक घडी विस्कटली आहे. महाराष्ट्रातील तरुणाईलाही त्याची झळ पोहोचली आहे. शिवाजी महाराजांचे विचार लक्षात घेऊन प्रत्येकाने वाटचाल करण्याची गरज आहे.त्यानंतर होळीच्या माळावरून उत्सवमूर्ती जगदीश्‍वर मंदिराकडे नेण्यात आली. शिवसमाधीला अभिवादन झाल्यानंतर सोहळ्याची सांगता झाली.
‘करोना योद्धां’चा सन्मान
करोनाच्या संकटात विविध क्षेत्रांतील कर्मचारी, महिला, युवक सेवा बजावत आहेत. करोना योद्धा म्हणून त्यांची ही सेवा उल्लेखनीय ठरत आहे. त्यांचा राजसदरेवरून सन्मान व्हावा याकरिता ‘करोना योद्धा’ प्रमाणपत्र त्यांना आज समर्पित करण्यात आले. बंदोबस्ताच्या निमित्ताने उपस्थित असलेल्या दोघा पोलीस कर्मचाऱ्यांना ते प्रतीकात्मकरित्या देऊन त्यांचा सत्कार करण्यात आला. हे प्रमाणपत्र ई-मेलद्वारे सर्व करोना योद्‌ध्यांना पाठवले जाणार आहे.
