जळगाव – (प्रतिनिधी) – कवियत्री बहिणाबाई चौधरी उत्तर महाराष्ट्र विद्यापीठाच्या गेल्या काही महिन्यांपासून सुरू असलेल्या गैरकारभाराबद्दल एनएसयूआयच्या वतीने माहिती राज्य सरकारला दिलेली आहेच. परंतु बेजबाबदारपणाची हद्द ओलांडून विद्यापीठातील वरिष्ठांनी पदांचा दुरुपयोग करून विद्यापीठाची बदनामी होईल व विद्यापीठामध्ये एकाच विचाराचे अराजक माजेल, या प्रकारचे काम सुरू ठेवले आहे. त्यामुळे या विद्यापीठाची वाटचाल जेएनयु विद्यापीठाच्या दिशेने सुरू असल्याची तक्रार एनएसयूआयने राज्यपाल व मुख्यमंत्र्यांकडे केली आहे.
प्र-कुलगुरू प्राध्यापक माहुलीकर यांनी विद्यापीठांतर्गत संदेश देताना थेट एका विशिष्ट राजकीय विद्यार्थी संघटनेच्या फेसबूक लाईव्ह पेज वर जाऊन संबोधले. त्यामुळे आता विद्यापीठांमधील विद्यार्थी संभ्रमात आहेत की, हे विद्यापीठ आहे का ? एका विशिष्ट राजकीय संघटनेचे व्यासपीठ आहे ?
यामुळे महाराष्ट्र विद्यापीठ कायदा अंतर्गत कलम 16 व पोटकलम (5) अंतर्गत प्र-कुलगुरू यांनी राज्य शासनाच्या विविध अटी, शर्ती व अधिकारांचा दुरुपयोग केल्यामुळे प्र-कुलगुरू यांच्यावर कुलपती यांच्याकडून या संपूर्ण प्रकाराची चौकशी करून प्र-कुलगुरू यांना पदावरून दूर करण्यात यावेे. अन्यथा जळगाव जिल्हा एनएसयुआयकडून आंदोलन छेडण्यात येईल, असा इशारा एन एस यू आयचे जिल्हाध्यक्ष देवेंद्र मराठे यांनी दिला आहे.
