जळगाव ( प्रतिनिधी ) – कृषी क्षेत्रातील अग्रगण्य कंपनी जळगावची जैन इरिगेशन सिस्टम्स लिमिटेड आणि सोलापूर येथील राष्ट्रीय डाळिंब संशोधन केंद्र यांच्यामध्ये डाळींबाच्या ‘ सोलापूर लाल ‘ या संशोधित व हायब्रीड वाणाची टिश्यूकल्चरच्या सहाय्याने निर्मिती करून देशात प्रसार करण्यासाठी सामंजस्य करार झाला आहे
डाळिंब केंद्राचे संचालक डॉ . आर . ए . मराठे यांच्यासह जैन टिशू कल्चरचे डॉ. अनिल पाटील व के. बी. पाटील यांनी या करारावर सह्या केल्या डाळिंबाची सोलापूर लाल ही जात पोषण दृष्टीने उत्तम असून त्यात लोहाचे प्रमाण भरपूर असते. त्यावर उष्णतेचा परिणाम कमी होतो. जास्त तापमानात सुद्धा दाण्यांचा रंग चांगला असतो. फळांचा रंग, गंध तसेच आतील दाण्यांचा लाल रंग व उत्तम चव तसेच प्रोटीन, झिंक आणि ‘क’ जीवन सत्वाचे प्रमाण अधिक आहे. ही जात भगव्याच्या तुलनेत 15 ते 20 दिवस लवकर येते. सर्वच दृष्टीने सोलापूर लाल हे डाळींबाचे वाण उजवे ठरलेले आहे.त्यामुळे डाळिंब उत्पादक त्याकडे वळत आहेत. प्रक्रियेसाठी सुद्धा चांगली जात आहे.
जैन इरिगेशनचे टिश्युकल्चर डाळिंबामध्ये जगात लौकीक आहे. कंपनी दरवर्षी 70 लाख डाळिंबाची रोपे निर्माण करते. आता सोलापुर लाल निर्मितीचे अधिकार मिळाले आहेत त्यामुळे सोलापूर लाल जातीचे क्षेत्र वाढेल.
हा सामंजस्य करार करताना परभणी कृषी विद्यापीठाचे संशोधन संचालक डॉ. डी.पी. वासकर, प्रधान शास्त्रज्ञ डॉ. जोत्सना शर्मा, अखिल भारतीय डाळिंब उत्पादक संघाचे अध्यक्ष प्रभाकर चांदणे, डॉ. एन. व्ही सिंग, डॉ. गायकवाड, डॉ. मल्लिकार्जुन, डॉ. प्रकाश कुलकर्णी, तुषार जाधव, डॉ एस.व्ही. जजीनवार, डॉ. मंजुनाथ बागलकोट हे उपस्थित होते.
