सोलापूर (वृत्तसंस्था) – कोरोना व्हायरसचा संसर्ग रोखण्यासाठी माढा नगरपंचायतच्या नगराध्यक्षा अॅड मीनल साठे यांच्या संकल्पनेतून माढा वासिंयाना जीवनावश्यक सेवेतील सर्व साहित्य विनामुल्य घरपोहच मिळणार आहे.असा उपक्रम राबवणारी सोलापूर ही जिल्ह्यातील पहिली नगरपंचायत ठरली आहे. बाजारपेठेत नागरिकांची जीवनावश्यक वस्तूच्या दुकानात होत असलेली गर्दी रोखण्यासाठी नगराध्यक्षा अॅड मीनल साठे यांनी माढेकरांच्या सुरक्षिततेच्या दृष्टीने हा निर्णय घेतला. नगराध्यक्षा अॅड साठे, मुख्याधिकारी चरण कोल्हे,यांच्यासह नगरसेवकांच्या उपस्थितीत शहरातील जीवनावश्यक वस्तुच्या व्यापार्याशी चर्चा मसलत झाली. बैठकीत अॅड साठे यांनी घरपोहच वस्तु देण्याचा उद्देश मांडला. व्यापाऱ्यांनी या निर्णयास सहमती दर्शवली. त्यानुसार माढेकरांना किराणा साहित्य्, भाजीपाला, फळे, शुध्द पाणी, चिकन, अंडी, मटण, मासे हे एका मॅसेजवर घरपोहच मिळणार आहे. सर्व व्यावसायिकांचे नाव नंबर चे पत्रक सोशल माध्यमावर व्हायरल केले असुन स्वच्छता निरीक्षक शिवाजी सांगळे यांनी देखील ध्वनिक्षेपकाद्वारे माहिती दिलीय. ग्राहकांकडुन संबधित व्यावसायिकाला त्यांच्या व्हाटस्अप नंबरवर मागणी येईल. पत्ता सांगितल्यानंतर घरपोहच साहित्य मिळणार आहे. या कामी प्रियदर्शनी महिला मंडळ व नगरपंचायतचे कर्मचारीदेखील सहकार्य करित आहेत. साहित्य पुरवठा करणाऱ्यास तोंडाला मास्क लावले जात आहे. कोरोनाच्या पार्श्वभूमीवर बाजारपेठेतील गर्दी रोखण्यासाठी घरपोहच साहित्य पुरवठ्याचा नगरपंचायतने सुरु केलेला उपक्रम अनुकरणीय असा आहे. कोरोना व्हायरसला हरवण्यासाठी माढेकरांनी निर्धार केलाय.
