मुंबई (वृत्तसंस्था) – करोनाचा फैलाव रोखण्यासाठी सर्वतोपरी प्रयत्न सुरु असताना राज्य सरकारला केंद्र सरकारकडून रॅपिड टेस्टसाठी परवानगी मिळाली आहे. आरोग्यमंत्री राजेश टोपे यांनी ही माहिती दिली आहे. पंतप्रधान नरेंद्र मोदी यांनी आज व्हिडीओ कॉन्फरन्सिंगच्या माध्यमातून सर्व राज्याचे मुख्यमंत्री, आरोग्यमंत्री आणि गृहमंत्री यांच्याशी संवाद साधला. यावेळी त्यांनी आपल्याला रॅपिड टेस्टसाठी परवानगी दिली असल्याचं राजेश टोपे यांनी सांगितलं आहे. यामुळे एखाद्या व्यक्तीला करोनाची लागण झाली आहे की नाही याची माहिती पाच मिनिटात मिळणार आहे.राजेश टोपे यांनी दिलेल्या माहितीनुसार, “टेस्टिंग वाढवलं पाहिजे अशी अपेक्षा नरेंद्र मोदी यांनी व्यक्त केली आहे. पाच हजार चाचण्या करण्याची आपल्या राज्याची क्षमता आहे. आपल्याला याआधी रॅपिट टेस्टसाठी परवानगी मिळाली नव्हती. मात्र आता ती मिळाली आहे. रॅपिड टेस्टच्या माध्यमातून प्राथमिक चाचणी म्हणजेच स्क्रिनिंग केल्याने एखाद्याला करोनाची लागण झाली आहे की नाही हे पाच मिनिटात कळणार. करोनाची लागण झाली आहे का हे रक्ताचा नमुना घेतल्यानंतर पाच मिनिटांत स्पष्ट होईल. शरिरात तयार झालेल्या रोगप्रतिकारकांच्या प्रमाणावरुन हे निश्चित केलं जाईल”. राज्य शासनाकडून त्यासंबंधी कारवाई केली जाईल. यावरुन आपल्याला करोनाची लागण झालेल्यांच्या संख्येचा अंदाज आला तर त्यांना तात्काळ त्यांचं विलगीकरण करत उपचार केले जातील अशी माहिती राजेश टोपे यांनी यावेळी दिली.
