नवी दिल्ली (वृतसंस्था) – कोरोना रुग्णांसाठी प्लाझ्मा थेरेपी आता आशेचा किरण ठरताना दिसत आहे. कोरोनाची लागण झालेले दिल्लीचे आरोग्यमंत्री सत्येंद्र कुमार जैन यांच्यावर प्लाझ्मा थेरेपी यशस्वी होताना दिसली. आता इतर कोरोना रुग्णांवरही या थेरेपीचा सकारात्मक परिणाम दिसून आला आहे. मुख्यमंत्री अरविंद केजरीवाल यांनी कोरोना रुग्णांवरील प्लाझ्मा थेरेपीबाबत महत्त्वाची माहिती दिली आहे.
प्लाझ्मा थेरेपीमुळे कोरोना रुग्णांचा मृत्यूचा दर 50 टक्के कमी झाला आहे. मात्र ही थेरेपी मॉडरेट रुग्ण म्हणजे मध्यम स्वरूपाची लक्षणं असलेल्या रुग्णांवरच परिणामकारक ठरत आहे, अशी माहिती केजरीवाल यांनी शुक्रवारी व्हिडीओ कॉन्फ्रेसिंगद्वारे प्रसारमाध्यमांशी बोलताना दिली.
केजरीवाल यांनी सांगितलं, सध्या एलएनजेपी आणि राजीव गांधी सुपर स्पेशालिटी रुग्णालयात प्लाझ्मा थेरेपीने कोरोना रुग्णांवर उपचार करण्यास परवानगी मिळाली आहे. LNJP रुग्णालयात सर्वात आधी कोरोना रुग्णांवर प्लाझ्मा थेरेपीने उपचार केले. या रुग्णालयात कोरोना रुग्णांच्या मृत्यूचं प्रमाण कमी झालं आहे. मृत्यूचा दर 50 टक्के कमी झाला आहे.
ही थेरेपी मॉडरेट म्हणजे मध्यम स्वरूपाची लक्षणं असलेल्या रुग्णांवर जास्त परिणामकारक आहे. अति गंभीर कोरोना रुग्णांना या थेरेपीमार्फत वाचवणं कठीण आहे, असंही ते म्हणाले.ला
दरम्यान दिल्लीचे आरोग्यमंत्री सत्येंद्र कुमार जैन यांच्यावरही प्लाझ्मा थेरेपी यशस्वी होत असल्याचं दिसलं. या थेरेपीनंतर 24 तासांतच ते आयसीयूमधून बाहेर आले. त्यांना जनरल वॉर्डमध्ये शिफ्ट करण्यात आलं. आता त्यांची प्रकृती स्थिर आहे.
सध्या कोरोनाशी लढण्यासाठी आवश्यक त्या सोयीसुविधा पुरेशा प्रमाणात आहे. मात्र आयसीयू बेडची आवश्यकता आहे. त्याचीही सोय केली जाते आहे. ज्या रुग्णांवर घरी उपचार सुरू आहेत त्यांना आम्ही ऑक्सिमीटर देत आहोत. ऑक्सिजनची पातळी 94 पेक्षा कमी झाल्यास तात्काळ आम्हाल कळवण्याच्या सूचना देण्यात आल्यात. आमची टीम तात्काळ पोहोचेल आणि तुम्हाला रुग्णालयात घेऊन जाईल.
