नवी मुंबई (वृत्तसंस्था) – मुंबईतील सर्वात जुन्या गणेश मंडळांपैकी एक असलेल्या गणेश गल्लीतील मुंबईच्या राजा मंडळाने यंदाचा गणेशत्सव साधेपणाने साजरा करण्याचा निर्णय घेतला आहे. यावर्षी विशाल मूर्ती ऐवजी छोटी मूर्तीची प्रतिष्ठापना करण्याचा निर्णय घेतला आहे. हे मंडळ आपल्या भव्य मूर्तीसाठी आणि आकर्षक सजावटीसाठी प्रसिद्ध आहे.
यंदा कोरोनाचे सावट गणेशोत्सवावरही पडताना दिसत आहे. मुंबईतील गणेश गल्लीतील मुंबईचा राजा गणेशोत्सव मंडळाने यंदा विशाल मूर्ती ऐवजी केवळ चार फुटांची मूर्तीची प्राण प्रतिष्ठापना करण्याचा निर्णय घेतला आहे.
मुंबईचा राजा मंडळाचे सचिव स्वप्निल परब यांनी सांगितले की प्रशासनाच्या आदेशानंतर यंदाचा गणेशोत्सव अत्यंत साधेपणाने साजरा करण्याचा निर्णय घेतला आहे. मूर्तीच उंची केवळ चार फूट ठेवणार आहे. यापूर्वी ही उंची २२ फुटांच्या आसपास असायची. तसेच यंदा मिरवणूक न काढता कृत्रिम तलावात गणपती विसर्जन केले जाणार आहे.
यापूर्वी मुंबईतील सर्वात श्रीमंत गणेश मंडळ असलेल्या वडाळ्यातील जीएसबी मंडळ्याने २०२१ पर्यंत गणेशोत्सव स्थगित केला आहे. यंदा गणेशोत्सव न करतान माघ महिन्यात गणेशोत्सव साजरा करणार असल्याचे त्यांच्याकडून यापूर्वीच स्पष्ट करण्यात आले आहे.
काही दिवसांपूर्वी मुख्यमंत्री उद्धव ठाकरे, उपमुख्यमंत्री अजित पवार आणि गृहमंत्री अनिल देशमुख यांच्या नेतृत्त्वाखाली काही दिवसांपूर्वी मुंबईतील गणेशोत्सव मंडळांची बैठक झाली होती. यात मुख्यमंत्र्यांनी गणेशोत्सव साधेपणाने करण्याचे आवाहन केले होते. मूर्ती मोठ्या नको, मिरवणूक नको, जास्त गर्दी होईल असे कार्यक्रम नको, नाच गाणे नको, मंडळात संख्या मर्यादीत हवी अशा सूचना केल्या होत्या. त्याला प्रतिसाद देत मुंबईतील अनेक मंडळांनी साधेपणाने गणेशोत्सव साजरा करण्याचे ठरवले आहे.
मुख्यमंत्र्यांनी केलं कौतुक
मुंबईतील गणेश मंडळांची समाजाभिमुख उपक्रमात योगदान देण्याची परंपरा आहे. त्यामुळे कोरोनाच्या संकट काळात मंडळे आरोग्यविषयक जनजागृती, आरोग्य मेळावे, शिबिरे आदी उपक्रमांद्वारे यावर्षीही हिरिरीने पुढे राहतील, असा विश्वास मंडळांच्या पदाधिकाऱ्यांनी दिला, यासाठी मुख्यमंत्री उद्धव ठाकरे यांनी गणेश मंडळांच्या या वैशिष्ट्यांचा पुनरूच्चार करतानाच, त्यांचे कौतुकही केले.
मूर्तींची उंची लहान ठेवण्याबाबत विचार करावा
मुख्यमंत्री उद्धव ठाकरे म्हणाले, कोरोना विषाणूचे सावट असल्याने यंदा सार्वजनिक गणेश उत्सवाच्या स्वरुपावर मर्यादा येईल. त्यामुळे यंदा उत्सव मंडळांनी मूर्तींची उंची लहान ठेवण्याबाबत विचार करावा. प्रत्येक छोट्या – मोठ्या गोष्टींचे कोरोना विषाणूच्या प्रादुर्भाव आणि त्याला रोखण्यासाठीच्या उपाययोजनांच्या अंगाने नियोजन करावे. उत्सव मंडपही लहान असावेत. सोशल डिस्टन्सिंग आणि आरोग्यविषयक सर्व काळजी घेण्याचे नियोजनही याठिकाणी करावे लागेल. विषाणूचे संकट टळल्यानंतर, पुढच्या वर्षी हाच गणेशोत्सव गतवर्षीच्या उत्सवाच्या कितीतर पट उत्साहाने साजरा करता येईल. हा विश्वास बाळगून यंदाचा उत्सव साजरा करूया.
चर्चेत सहभागी समितीचे पदाधिकारी तसेच सदस्यांनीही आरोग्य शिबिरे, विषाणू प्रादुर्भावाबाबत जनजागृती तसेच वैद्यकीय सेवा-सुविधा लोकांपर्यंत पोहोचविण्यासाठी उपक्रमांचे नियोजन करू. मूर्तींच्या उंचीबाबत शासनाने मार्गदर्शक सूचना दिल्यास, त्यांचे पालन केले जाईल. कोरोना विषाणू आणि आरोग्यविषयक आणि स्वच्छतेबाबत शासनस्तरावरून दिल्या जाणाऱ्या सूचनांचे पालन केले जाईल, अशी भूमिका मंडळांच्या पदाधिकाऱ्यांनी घेतली. यावेळी मूर्तीची उंची, उत्सवाचे स्वरूप यांसह पारंपारिक विसर्जन मार्ग आणि गणेश विसर्जन व्यवस्था या अनुषंगानेही चर्चा झाली.
