नवी दिल्ली (वृत्तसंस्था) – चीनचे मुखपत्र ‘ग्लोबल टाईम्स’मधील तो अहवाल भारताने फेटाळून लावला आहे, ज्यात म्हटले आहे की संरक्षणमंत्री राजनाथ सिंह बुधवारी मॉस्को येथे आपल्या चिनी समकक्षांना भेटू शकतात. संरक्षण मंत्रालयाने हे स्पष्ट केले आहे की संरक्षण मंत्री राजनाथ सिंह मॉस्कोमध्ये चीनच्या संरक्षण मंत्र्यांची भेट घेणार नाहीत. त्याआधी ‘ग्लोबल टाईम्स’ने संध्याकाळी उशिरा ट्विट केले होते, ‘चिनी संरक्षणमंत्री वेई फेंग बुधवारी मॉस्को येथे रशियाच्या विजय दिनाच्या परेडमध्ये भाग घेतील आणि शक्यतो आपले भारतीय समकक्ष राजनाथ सिंह यांच्यासमवेत बैठक घेतील.’ संरक्षण मंत्रालयाच्या प्रवक्त्याने मात्र कोणत्याही बैठकीचे नियोजन नसल्याचे सांगितले.
लडाखमधील चीनसोबतच्या तणावादरम्यान हे वृत्त समोर आले होते. गलवान खोऱ्यात चिनी सैनिकांशी झालेल्या हिंसक संघर्षात कर्नलसह सैन्याच्या 20 जवानांना आपला जीव गमवावा लागला. तसेच 70 हून अधिक जवान जखमी झाले आहेत. या घटनेत जखमी जवानांची प्रकृती सध्या ठीक आहे आणि येत्या एका आठवड्यात जवान ड्युटीवर दाखल होतील असे सैन्याने म्हटले आहे.
दुसरीकडे, 22 जून रोजी भारत-चीन तणावादरम्यान भारत आणि चीनमधील लेफ्टिनेंट कमांडर स्तरावरील अधिकाऱ्यांमध्ये संभाषण झाले आहे. हे संभाषण अतिशय चांगल्या वातावरणात झाल्याचे समोर आले आहे आणि जवानांच्या वापसीसंदर्भात दोन्ही देशांनी परस्पर सहमती दर्शविली आहे. सैन्य सूत्रांकडून ही माहिती मिळाली आहे. सैन्य सूत्रांनी सांगितले की दोन्ही देशांच्या सैन्याने पूर्वेकडील लडाख येथून माघार घेण्यास सहमती दर्शविली आहे. मंगळवारी सैन्याने म्हटले आहे की, सोमवारी दोन्ही देशांनी गलवान खोऱ्यामधील संघर्ष आणि इतर संघर्षांच्या मुद्द्यांविषयी लेफ्टनंट कमांडर स्तरावर चर्चा केली, ज्यात दोन्ही देशांनी सैन्य माघार घेण्यासाठी परस्पर सहमती दर्शविली. सैन्याने सांगितले की ही संभाषणे अत्यंत सकारात्मक आणि उत्तम वातावरणात झाली आहेत.
दुसरीकडे, भारत आणि चीनमधील सुरू असलेल्या वादात रशियाने कोणत्याही प्रकारची मध्यस्थी करण्यास यापूर्वीच नकार दिला आहे. मंगळवारी आरआयसी (रशिया-भारत-चीन) परराष्ट्र मंत्र्यांच्या आभासी बैठकीत रशियाचे परराष्ट्रमंत्री सर्गेई लॅवरॉव्ह म्हणाले की, ‘भारत आणि चीन या दोन्ही देशांमध्ये दीर्घ काळापासून चालू असलेल्या समस्यांचे निराकरण करण्यासाठी बाह्य मदतीची आवश्यकता नाही.’
अधिक माहिती म्हणजे संरक्षणमंत्री राजनाथ सिंह सोमवारी तीन दिवसांच्या रशिया दौर्यावर रवाना झाले. दुसर्या महायुद्धात नाझी जर्मनीवरील सोव्हिएत विजयाच्या 75 व्या वर्धापन दिनानिमित्त आयोजित भव्य लष्करी परेडमध्ये भाग घेण्यासाठी ते रशिया येथे दाखल झाले आहेत. संरक्षणमंत्री दोन्ही देशांमधील सैन्य सहकार्य वाढविण्यासाठी रशियाच्या उच्च अधिकाऱ्यांसमवेत अनेक बैठका देखील घेतील. कोरोना साथीच्या पार्श्वभूमीवर चार महिन्यांच्या प्रवासावरील बंदीनंतर वरिष्ठ केंद्रीय मंत्र्यांची ही पहिली परदेशी भेट आहे.
