मुंबई (वृत्तसंस्था) – देशभरात लॉकडाउनमुळे सर्वसामान्यांना अनेक समस्यांना सामोरे जावे लागले आहे. अशातच चित्रपट सृष्टीतील काही अभिनेते अडचणीत आहेत. प्रसिद्ध पंजाबी अभिनेते सतीश कौल यांना सध्या प्रचंड आर्थिक समस्या जाणवत आहे. सतीश कौल यांनी अनेक हिंदी चित्रपट आणि महाभारतातही काम केले आहे.
सतीश कौल यांनी 300 हून अधिक पंजाबी आणि हिंदी चित्रपटांमध्ये काम केले असून महाभारतात त्यांनी इंद्राची भूमिका केली होती. मी लुधियानात एका छोट्या भाड्याच्या घरात राहत आहे. आधी वृद्धाश्रमात राहत होतो. पण सत्या देवी यांच्यामुळे सध्या भाड्याच्या घरात जागा मिळाली आहे. माझी प्रकृती चांगली आहे. पण लॉकडाउनमुळे परिस्थिती बिघडू लागली आहे. मला औषधे, भाजी आणि काही मुलभूत गोष्टींसाठी झगडावे लागत आहे. मला मदत करा असे मी चित्रपटसृष्टीला आवाहन करतोय. अभिनेता असताना माझ्यावर इतक्या जणांनी प्रेम केले. पण आता मला एक माणूस म्हणून मदतीची गरज आहे, असे सतीश कौल यांनी म्हटले आहे.
73 वर्षीय सतीश कौल यांनी ‘प्यार तो होना ही था’, ‘आंटी नंबर 1’ या चित्रपटांमध्येही काम केले आहे. त्यांनी 2011 मध्ये पंजाबला जाऊन अ‍ॅक्टिंग क्लास सुरु केला होता. 2015 मध्ये माझ्या पाठीचे हाड मोडल्यानंतर जे काम सुरु होते तेही थांबवावे लागले. दोन वर्ष मी रुग्णालयात होतो. नंतर मला वृद्धाश्रमात जावे लागले. तिथे मी दोन वर्ष राहिलो असल्याचे त्यांनी सांगितले आहे. अभिनय करत असताना लोकांनी जे प्रेम दिले त्याचा फार अभिमान वाटतो . मी सदैव त्यांचा ऋणी राहीन. मी राहू शकेन असे व्यवस्थित घर विकत घेण्यासाठी मी सक्षम व्हावे एवढीच अपेक्षा आहे अशी इच्छा त्यांनी व्यक्त केली आहे.
