नवी दिल्ली (वृत्त संस्था) – चीनला धडा शिकवण्यासाठी देशवासीयांनी चिनी उत्पादनावर बंदी घालावी अशी मागणी केली जात आहे. ‘बायकॉट चायना प्रोडक्ट’ या मोहिमेत सेलिब्रिटींनीही भाग घ्यावा अशी विनंती ‘कन्फेडरेशन ऑफ ऑल इंडिया ट्रेडर्स’ संस्थेने केली होती. या विनंतीला प्रतिसाद देत अभिनेता करणवीर बोहरा याने टिक-टॉक हे चिनी अॅप अनइन्स्टॉल केले आहे.
करणने इन्स्टाग्रामवर मोबाईलचे स्क्रीनशॉट शेअर करुन याबाबत चाहत्यांना माहिती दिली. मला माहिती आहे आपण घरी बसून काहीही करु शकत नाही. परंतु आपल्या जवानांसाठी प्रार्थना मात्र करु शकतो. सीमेवर राहून देशाचे संरक्षण करणार्या जवानांच्या सुरक्षिततेसाठी आपण देवाकडे प्रार्थना करुया. अशा आशयाची पोस्ट लिहून त्याने टिक-टॉक अॅप अनइन्स्टॉल केले आहे. त्याची ही पोस्ट सध्या सोशल मीडिया सर्वांचेच लक्ष वेधून घेत आहे. भारत-चीन सीमेवर सुरु असणार्या हिंसक घटनांमध्ये अनेकदा चीनकडून घुसखोरी करण्याचा प्रयत्न सुरु असल्याचे नमूद करीत करणने अॅप डिलीट केले आहे.
