वॉशिंग्टन (वृत्तसंस्था) – सोशल मीडियावर प्रसिद्ध असलेल्या फेसबुकचे आणि अमेरिकेचे राष्ट्राध्यक्ष डोनाल्ड ट्रम यांच्यामध्ये वाद होण्याची शक्यता आहे. ट्रम्प आणि ट्विटरचा वाद झाल्यानंतर ट्रम्प यांनी सोशल मीडियावर जोरदार टीका केली होती. यानंतर फेसबुकने ट्रम्प यांना जोरदार दणका दिला आहे. फेसबुकने डोनाल्ड ट्रम्प आणि अमेरिकेचे उपराष्ट्रपती माइक पेन्स यांच्या जाहिराती हटवल्या आहेत.
ट्रम्प यांच्या जाहिरातीमध्ये लाल रंगाचा उलटा त्रिकोण दर्शवला होता. या चिन्हाचा वापर नाझींनी राजकीय कैदी, कम्युनिस्ट आणि छळछावणीत कैद असलेल्या नागरिकांसाठी केला होता. फेसबुकचे नॅथेनियल ग्लीचर यांनी ट्रम्प यांची जाहिरता हटवण्यात आल्याचे मान्य केले आहे. द्वेष पसरवणाऱ्या कोणत्याही विचारधारांशी निगडीत चिन्हांना दाखवण्यास मनाई करण्यात आली आहे. फक्त एखाद्या संदर्भासह द्वेष पसरवणाऱ्या कृतीचा निषेध करण्यासाठी संबंधित चिन्हाचा वापर करण्यास परवानगी असल्याचे त्यांनी सांगितले.
ग्लीचर यांनी सांगितले की, कोणत्याही योग्य कारणाशिवाय ते चिन्ह दिसत असल्यामुळे जाहिरात काढण्यात आली. फेसबुकच्या नियमांचे पालन न झाल्यास जाहिरात हटवण्यात येणार असल्याचे त्यांनी सांगितले. तर त्या चिन्हाचा वापर एन्टीफा विरोधात करण्यात आला असल्याची माहिती ट्रम्प यांचे प्रचार मोहिमेचे संपर्क संचालक टिम मुर्तो यांनी सांगितले.
दरम्यान, मे महिन्याच्या अखेरीस अमेरिकेचे अध्यक्ष डोनाल्ड ट्रम्प यांच्या ट्विटबाबत ट्विटर कंपनीने प्रथमच सावधगिरीचा इशारा दिला होता. ट्म्प यांनी केलेल्या दोन ट्विटबाबत ट्विटरने इशारा दिला होता. या दोन ट्विटच्या अखेरीस ट्विटरने एक लिंक दिली आहे. मेल इन बॅलट्सची सत्या तपासा अशी ही लिंक आहे. त्यानंतर ट्रम्प यांनी ट्विटरवर नाराजी व्यक्त करत टीका केली होती.
