मुंबई (वृत्तसंस्था) – राज्य शासनाने दिलेल्या आदेशानुसार कोरोना विषाणूंचा प्रादुर्भाव रोखण्यासाठी मुंबई डबेवाल्यांची सेवा २० मार्च ते ३१ मार्चपर्यंत बंद ठेवण्याचा निर्णय नूतन मुंबई टिफिन बॉक्स सप्लायर्स चॅरिटी ट्रस्ट व मुंबई जेवण डबे वाहतूक मंडळाने घेतला आहे. यामुळे सुमारे 2 लाख चाकरमान्यांना आपल्या घरच्या जेवणास मुकावे लागणार आहे. परिस्थितीचा आढावा घेऊन पुन्हा १ एप्रिलपासून सेवा नियमितपणे सुरू करण्यात येईल असे डबेवाला संघटनेचे अध्यक्ष उल्हास मुके यांनी सांगितले.
सर्व नागरिकांनी घराबाहेर पडू नये तसेच स्वतःची काळजी घ्यावी व शासनाने दिलेल्या आदेशांचे पालन करावे. तसेच सोशल मीडियावर येणाऱ्या अफवांवर विश्वास ठेवू नका, असेही आव्हान डबेवाला संघटनेकडून करण्यात आले आहे. मुंबई डबेवाल्यांच्या 130 वर्षाच्या इतिहासात प्रथमच सलग 10 दिवस सेवा बंद ठेवण्याचा निर्णय घेण्यात आला आहे. संसर्गजन्य कोरोना विषाणूचा प्रादुर्भाव रोखण्यासाठी डबेवाल्यांनी हा निर्णय घेतला आहे. मुंबईत 5 हजार डबेवाला जेवणाचे जवळपास 2 लाख डबे पोहोचवण्याचे काम करत आहेत.रेल्वेच्या तीनही मार्गावरुन डबेवाले जेवणाचे डबे पोहोचवण्याचे काम करत असताना प्रचंड गर्दीतून हे काम करावे लागते. कोरोनाचा संसर्ग टाळण्यासाठी गर्दी करु नये, असे आवाहन सरकारने केल्यानंतर मुंबई डबेवाला संघटनेकडून हा निर्णय घेण्यात आला असल्याचे प्रवक्ते विनोद शेटे यांनी सांगितले.
