महावितरणचे काम करताना नशिराबाद येथे घडली घटना
जळगाव (प्रतिनिधी) : तालुक्यातील नशिराबाद येथे बाजारपट्टा भागात महावितरणचे काम करीत असताना ठेकेदाराकडील मजुराला खांब्यात विद्युतप्रवाह उतरल्याने विजेचा जबर धक्का बसून त्याचा मृत्यू झाल्याची धक्कादायक घटना बुधवारी दि. १९ फेब्रुवारी रोजी सकाळी १० वाजेच्या सुमारास उघड झाली आहे. याप्रकरणी नशिराबाद पोलीस स्टेशनला अकस्मात मृत्यूची नोंद करण्यात आली आहे.
अशोक तिजू पुराम (वय ३९, रा. सुकडी ता. देवरी जि. गोंदिया, ह. मु. भादली रोड) असे मयत मजुराचे नाव आहे. त्याच्या पश्चात वडील, पत्नी, २ मुले, भाऊ असा परिवार आहे. (केसीएन)महावितरणने भारत इलेक्ट्रिक कंपनी, कुपवाड जि. सांगली या कंपनीला विविध कामांचे कंत्राट दिलेले आहे. त्यानुसार या कंपनीचे सुपरवायझर हर्षल कदम (रा. खेडी) यांचे सांगणेनुसार काही मजूर नशिराबाद येथे महावितरणचे काम करीत होते. दरम्यान, बुधवारी सकाळी बाजारपट्टा भागात काम सुरु असताना अशोक पुराम यांच्याकडून वीज बंद करताना काहीतरी चूक झाली असावी, त्यात सिमेंटच्या खांब्यात विद्युतप्रवाह उतरून अशोक पुराम याला विजेचा जोरदार धक्का बसला व तो खाली पडला.
सोबतच्या मजुरांनी तत्काळ त्याला शासकीय वैद्यकीय महाविद्यालय व रुग्णालयात उपचारासाठी दाखल केले. मात्र तेथे वैद्यकीय अधिकाऱ्यांनी तपासून मयत घोषित केले. (केसीएन)यामुळे सोबतच्या मजूरांना धक्का बसला आहे. तर मयत अशोक पुराम याच्या कुटुंबियांना गोंदिया येथे कळविण्यात आले. दुपारी शवविच्छेदन झाल्यावर मृतदेह त्याच्या गावी सुकडी येथे रवाना झाला आहे. घटनेप्रकरणी नशिराबाद पोलीस स्टेशनला अकस्मात मृत्यूची नोंद करण्यात आली आहे.
