एरंडोल शहरात चौधरीवाडा येथील घटना
एरंडोल (प्रतिनिधी) :- येथील चौधरीवाडा परिसरातील ३८ वर्षीय युवकाने शनिवारी रात्री साडेनऊ वाजेच्या सुमारास राहत्या घरात गळफास घेवून आत्महत्या केली.आत्महत्येचे कारण समजू शकले नाही. याप्रकरणी एरंडोल पोलीस स्टेशनला अकस्मात मृत्यूची नोंद करण्यात आली आहे.
चौधरीवाडा परिसरातील रहिवासी रुपेश रामदास पाटील (वय ३८) असे मयत तरुणाचे नाव आहे. त्यांच्या पश्चात वृद्ध आई व एक लहान मुलगी आहे. युवकाने शनिवारी रात्री साडेनऊ वाजेच्या सुमारास राहत्या घरात साडीने गळफास घेवून आत्महत्या केली.(केसीएन)रुपेश पाटील हा हॉटेलवर कामगार म्हणून काम करत होता. तीन ते चार महिन्यांपासून तो कायम तणावात राहत होता, अशी माहिती मित्रांकडून मिळाली. शनिवारी रात्री त्याची आई बाहेर गेली होती. त्याचवेळेस रूपेशने गळफास घेतला. रुपेशची आई घरी आली असता त्यांना रूपेशने गळफास घेतल्याचे दिसताच त्यांनी हंबरडा फोडला. नागरिकांनी त्यास एरंडोल ग्रामीण रुग्णालयात नेले असता तो मयत झाल्याचे डॉक्टरांनी तपासून सांगितले. एरंडोल पोलीस स्थानकात अकस्मात मृत्यूची नोंद करण्यात आली असून हवालदार बापू पाटील तपास करीत आहेत.
