जिल्हा परिषदेच्या सीईओंचा उपक्रम
जळगाव (प्रतिनिधी) :- जिल्हा परिषदेच्या मुख्य कार्यकारी अधिकारी मिनल करनवाल यांच्या मार्गदर्शनाखाली आता नागरिकांना दररोज व्हिडिओ कॉन्फरन्सद्वारे जिल्हा परिषदेच्या वरिष्ठ अधिकाऱ्यांशी थेट संवाद साधता येणार आहे.दरम्यान नागरिकांशी संवाद या उपक्रमाचे उद्घाटन जिल्हा परिषदेच्या मुख्य कार्यकारी अधिकारी मिनल करनवाल यांचे हस्ते १४ मे बुधवार रोजी ऑनलाईन पद्धतीने संवाद साधून करण्यात आले. यावेळी मुख्य कार्यकारी अधिकारी करनवाल यांनी स्वत तक्रारदारांशी संवाद साधून त्यांची समस्या जाणून घेतली. ही योजना घोषित झाल्यानंतर पहिल्याच दिवशी अनेकांनी या योजनेला प्रतिसाद दिला.
नागरिक, ग्रामस्थ यांना त्यांच्या अडचणी, तक्रारी किंवा सूचना थेट प्रशासनापर्यंत पोहोचवण्याची सुविधा उपलब्ध करून देऊन नागरिकांना जिल्हा परिषद कार्यालयात प्रत्यक्ष येण्याची गरज भासू नये तर घरबसल्या त्यांना प्रशासनाशी संवाद साधया यावा असा या योजने मागचा मूळ उद्देश आहे.यासाठी जिल्हा परिषद प्रशासनाने झूम ॲपच्या माध्यमातून क्यू आर कोड व लिंक उपलब्ध करून दिली आहे.उपलब्ध करून दिलेला क्यू आर कोड सबंधित तक्रारदाराने स्कॅन केल्यानंतर तक्रारदाराला थेट जिल्हा परिषद प्रशासनाशी संवाद साधता येणार आहे. सोमवार ते शुक्रवार कार्यालयीन दिवशी सकाळी १०.३० ते ११.३० या कालावधीत संपर्क साधता येईल. बुधवार दि १४ रोजी उद्घाटन प्रसंगी अतिरिक्त मुख्य कार्यकारी अधिकारी रणधीर सोमवंशी, जिल्हा ग्रामीण विकास यंत्रणेचे प्रकल्प संचालक आर.एस लोखंडे, उपमुख्य कार्यकारी अधिकारी स्नेहा पवार, भाऊसाहेब अकलाडे, जिल्हा आरोग्य अधिकारी डॉ.सचिन भायेकर यांचेसह जिल्हा परिषदेचे सर्व विभाग प्रमुख व अधिकारी उपस्थित होते.
००००००००००००००००००००००
