नवी दिल्ली (वृत्तसंस्था) – पंतप्रधान नरेंद्र मोदी शुक्रवारी संयुक्त राष्ट्रांच्या आर्थिक आणि सामाजिक परिषदेच्या उच्चस्तरीय सत्राला डिजिटल माध्यमातून संबोधित करतील. गुरुवारी परराष्ट्र मंत्रालयाने ही माहिती दिली.
परराष्ट्र मंत्रालयाच्या निवेदनानुसार, पंतप्रधान शुक्रवारी संयुक्त राष्ट्रांच्या आर्थिक आणि सामाजिक परिषदेच्या समारोप अधिवेशनाला संबोधित करतील, ज्यात नॉर्वेचे पंतप्रधान आणि संयुक्त राष्ट्र संघटनेचे सरचिटणीस अँटोनियो गुतारेसुद्धा असतील.
यात म्हटले आहे की, संयुक्त राष्ट्र सुरक्षा मंडळाच्या तात्पुरत्या सदस्याच्या निवडणुकीत भारताच्या विजयानंतर ही पहिलीच वेळ असेल जेव्हा पंतप्रधान संयुक्त राष्ट्रांना संबोधित करतील. २०२१-२२ च्या सत्रासाठी ‘भारत’ संयुक्त राष्ट्रांच्या सुरक्षा परिषदेचा तात्पुरता सदस्य म्हणून निवडला गेला आहे.
मंत्रालयाने म्हटले आहे की संयुक्त राष्ट्रांच्या ७५व्या स्थापना दिनानिमित्त आर्थिक आणि सामाजिक परिषदेच्या उच्चस्तरीय अधिवेशनाचा विषय म्हणजे ‘कोविड -१९ नंतर बहुपक्षीयता’, यामध्ये कोविड १९ नंतरच्या जगात बहुपक्षीय सुधारणांची चर्चा आहे.
या वार्षिक उच्च स्तरीय सत्रामध्ये सरकारी, खाजगी क्षेत्र, नागरी संस्था आणि शैक्षणिक यासह विविध गटातील उच्च स्तरीय प्रतिनिधींचा समावेश असेल. यामध्ये, 75 व्या वर्धापन दिनानिमित्त संयुक्त राष्ट्र कसे हवे आहे, याचा विचार देखील केला जाऊ शकतो.
आंतरराष्ट्रीय वातावरणात बदल आणि कोविड-१९ साथीच्या रोगांच्या पार्श्वभूमीवर या सत्रात बहुपक्षीय प्रणालीला आकार देण्याशी संबंधित मुख्य घटक आणि मजबूत नेतृत्व, प्रभावी आंतरराष्ट्रीय संस्था, व्यापक गुंतवणूकीद्वारे जागतिक अजेंडा बळकट करण्याच्या मार्गावर लक्ष केंद्रित केले जाऊ शकते.
