जळगावातील हॉटेल रॉयल पॅलेस जवळची घटना
जळगाव (प्रतिनिधी) : शहरातील हॉटेल रॉयल पॅलेस समोरील रस्त्याने शतपावली करण्यासाठी गेलेल्या वर्ल्ड हेल्थ ऑर्गनायझेशनच्या नाशिक विभागाचे क्षयरोग अधिकारी यांना भरधाव वेगाने येणाऱ्या अज्ञात कारने उडविल्याने जागीच ठार झाल्याची घटना बुधवार दि. ८ मे रोजी रात्री ११.३० वाजता घडली आहे. याप्रकरणी रामानंदनगर पोलीस ठाण्यात गुरूवार ९ मे रोजी घटनेची नोंद करण्यात आली आहे.
हर्षद भाऊराव लांडे (वय-४३ रा. गोरवले रोड, पोर्तूगीज चर्चजवळ, मुंबई) असे मयत झालेल्या अधिकाऱ्याचे नाव आहे. हर्षद लांडे हे वडील, पत्नी आणि मुलगा यांच्या सोबत मुंबई येथील पोर्तूगीज चर्चजवळ वास्तव्याला आहे. ते वर्ल्ड हेल्थ ऑर्गनायझेशन च्या नाशिक विभागाचे क्षयरोग अधिकारी म्हणून नोकरीला होते. बुधवार दि. ८ मे रोजी मध्यरात्री १ वाजता ते डब्ल्यूएचओच्या एका महत्वाच्या बैठकीसाठी ते आपल्या टिमसह जळगाव शहरातील हॉटेल मिनर्वा येथे उतरले होते. ८ मे रोजी दिवसभर त्यांनी मिटींगला हजेरी लावली. बैठक आटोपल्यानंतर त्यांनी जेवण केले.
त्यानंतर रात्री ११ वाजेच्या सुमारास ते हॉटेल रॉयल पॅलेस येथे मित्राला भेटण्यासाठी गेले होते. भेटून परत जात असताना रस्ता ओलांडताना भरधाव येणाऱ्या कारने त्यांना जोरदार धडक दिली. या अपघातात त्यांच्या डोक्याला गंभीर दुखापत झाली. त्यांना रस्त्यावरून जाणाऱ्या नागरीकांनी धाव घेवून खासगी वाहनातून शासकीय वैद्यकीय महाविद्यालयात रवाना करण्यात आले. यावेळी वैद्यकीय अधिकारी यांनी मयत घोषीत केले. या घटनेप्रकरणी रामानंद नगर पोलीस ठाण्यात गुरूवार दि. ९ मे रोजी पहाटे ३ वाजता घटनेची नोंद करण्यात आली आहे.
