जळगाव शहरात महावितरणचा २० वा वर्धापन दिन उत्साहात
जळगाव (प्रतिनिधी) :- महावितरणच्या जळगाव परिमंडळाचे मुख्य अभियंता आय. ए. मुलाणी, परवीन आय. मुलाणी व अधीक्षक अभियंता विनोद पाटील यांच्या प्रमुख उपस्थितीत जळगाव शहरातील छत्रपती संभाजी महाराज नाट्य संकुलात झालेल्या समारंभात बाल-गोपाळांच्या हस्ते केक कापून महावितरणचा 20 वा वर्धापन दिन उत्साहात साजरा झाला.
शुक्रवारी दि. ६ जून रोजी नाट्यगृहात मुख्य अभियंता मुलाणी यांच्या हस्ते दीप प्रज्वलन करून समारंभाला सुरुवात झाली. प्रारंभी सकाळी एम. आय. डी. सी. पोलीस ठाण्याचे अधिकारी गणेश वाघ यांच्या प्रमुख उपस्थितीत सर्व अधिकारी कर्मचारी यांनी वीज सुरक्षेची शपथ घेतली. त्याच वेळी परिमंडळ कार्यालयाच्या सभागृहात ऊर्जा खात्याचे मंत्री व राज्याचे मुख्यमंत्री देवेद्र फडणवीस आणि महावितरणचे अध्यक्ष व व्यवस्थापकीय संचालक लोकेशचंद्र यांचा वर्धापन दिनानिमित्त शुभसंदेश असणारी चित्रफीतही कर्मचाऱ्यांना दाखविण्यात आली. त्यानंतर नाट्यगृहात झालेल्या समारंभात मुख्य अभियंता, अधीक्षक अभियंता, मानव संसाधन विभागाचे सहाय्यक महाव्यवस्थापक अशोक केदारे यांच्यासह सर्व विभाग प्रमुख अधिकारी, कामगार संघटनांचे पदाधिकारी यांचा सत्कार करण्यात आला.
कार्यक्रमाचे प्रास्ताविक अधीक्षक अभियंता विनोद पाटील यांनी केले. अध्यक्षीय भाषणात मुख्य अभियंता आय. ए. मुलाणी यांनी वीज सुरक्षेला प्राधान्य देऊन अपघात शून्य वीज सेवा देण्याचे आवाहन उपस्थित कर्मचाऱ्यांना केले. त्यानंतर मुक्ताईनगर विभागातर्फे ‘एन. एम. आर. – एक संघर्ष गाथा’ हे एकअंकी नाटक सादर केले. त्यानंतर संगीत, नृत्य, लोककला सादर करण्यात आल्या. दुपारनंतर झालेल्या समारंभात इतरही विविध सांस्कृतिक कार्यक्रम पार पडले. समारंभास अधिकारी-कर्मचारी सहकुटुंब उपस्थित होते. उपस्थितांची संख्या सुमारे हजार ते बाराशे इतकी होती. कार्यक्रमाचे सूत्रसंचालन सहाय्यक अभियंता रत्ना पाटील यांनी केले.
