मोबाईल, रोकड चोरी करणाऱ्या संशयित तरुणाला अटक

जळगाव (प्रतिनिधी) – शहरातील शिवाजीनगर हुडको परिसरात राहणाऱ्या रवीना रमेश सोनवणे यांच्या घरात १७ फेब्रुवारी रोजी रात्री अज्ञात चोरट्याने त्यांच्या घरातून दोन मोबाईल आणि १० हजार रुपये रोख असा ऐवज चोरून नेल्याची घटना घडली होती. या प्रकरणी शहर पोलीस स्टेशनमध्ये गुन्हा दाखल करण्यात आला होता. या गुन्ह्यातील संशयित आरोपीला जळगाव स्थानिक गुन्हे शाखेच्या पथकाने अटक केली आहे.

रेकॉर्डवरील गुन्हेगार तनवीर उर्फ तन्या शेख रहीम (वय १९, रा.गेंदालाल मिल, जळगाव) असे अटक केलेल्या संशयित आरोपीचे नाव आहे. पोलीस उपनिरीक्षक दत्तात्रय पोटे व त्यांच्या पथकाने तनवीरची कसून चौकशी केली असता, त्याने गुन्हा केल्याची कबुली दिली. त्याच्या ताब्यातून चोरीला गेलेले २ मोबाईल हस्तगत करण्यात आले आहेत. मात्र, चोरीला गेलेली रोख रक्कम अजून सापडलेली नाही. पोलिसांकडून पुढील तपास सुरू आहे.

ही कारवाई पोलीस अधीक्षक महेश्वर रेड्डी, अप्पर पोलीस अधीक्षक अशोक नखाते, उपविभागीय पोलीस अधिकारी संदीप गावित यांच्या मार्गदर्शनाखाली पोलीस उपनिरीक्षक दत्तात्रय पोटे, सहाय्यक फौजदार अतुल वंजारी, राजेंद्र मेढे, पोलीस हवालदार विजय पाटील, अक्रम शेख, प्रवीण भालेराव, प्रदीप चवरे यांनी सदर गुन्ह्याचा तपास केला. सध्या आरोपी तनवीर शेख याला जळगाव शहर पोलीस स्टेशनच्या ताब्यात देण्यात आले असून, पुढील कारवाई सहाय्यक फौजदार सुनील पाटील करीत आहेत.