जळगाव : दवाखान्यातून मोबाईल लंपास करणाऱ्या चोरट्याच्या स्थानिक गुन्हे शाखेच्या पथकाने मुसक्या आवळल्या असून त्याच्याकडून मोबाईल हस्तगत करण्यात आला आहे. संशयीत आरोपी किरण पाटील (रा.कानळदा ता. जि. जळगाव) असे त्याचे नाव आहे.
बहिणाबाई उद्यानाजवळ मधुर हॉस्पीटल असून त्या ठिकाणी दिपक सुभाष अहिरे हा तरुण कंपाऊंडरचे काम करतो. 31 जुलैच्या रात्री त्याची नाईट ड्युटी होती. यावेळी स्पेशल वार्डातील पाच रुग्णांवर देखरेख ठेवण्याची जबाबदारी दिपकवर सोपवण्यात आली होती.
त्याला देण्यात आलेल्या कंपाऊंडर रुममधे रात्रीच्या वेळी दिपकने त्याचा मोबाईल चार्जिंगसाठी लावला होता. सकाळी त्याला त्याचा मोबाईल जागेवरुन गायब झाला असल्याचे लक्षात आले. गायब झालेल्या मोबाईलचा सर्वत्र शोध घेतला असता तो कुठेही मिळून आला नाही.
याप्रकरणी जिल्हापेठ पोलिस स्टेशनला रितसर गुन्हा दाखल करण्यात आला. पो.नि.किरणकुमार बकाले यांच्या मार्गदर्शनाखाली या गुन्ह्याच्या तपासात दवाखान्यातील सीसीटीव्ही फुटेज तपासण्यात आले. सीसीटीव्ही फुटेज दरम्यान आढळून आलेल्या संशयीताचे नाव निष्पन्न करण्यात आले. संशयीत आरोपी किरण पाटील (रा.कानळदा ता. जि. जळगाव) असल्याचे उघड झाले.
पो.हे.कॉ.विजयसिंग धनसिंग पाटील, पो.हे.कॉ. सुधाकर रामदास अंभोरे, जितेंद्र पाटील, पो.हे. कॉ. रमेश बाबुलाल चौधरी, पो.ना. नितीन प्रकाश बाविस्कर, पो.ना.प्रीतम पितांबर पाटील, पो.ना.राहुल पाटील यांच्या पथकाने गुप्त बातमीदारामार्फत माहीती घेत किरण पाटील याचा शोध सुरु केला. तो जळगंव तालुका हद्दीतील कानळदा येथे असल्याचा सुगावा तपास पथकास लागला. कानळदा गावातील कन्या शाळेच्या चौकात एका पानटपरी जवळ तो उभा असतांना त्याची सखोल चौकशी केली असता तो किरण पाटील असल्याचे उघड झाले. त्याची अंगझडती घेतली असता त्याच्या ताब्यातून दवाखान्यातून चोरी झालेला विवो कंपनीचा मोबाईल हस्तगत करण्यात आला. त्याने आपला गुन्हा कबुल केला. त्याला ताब्यात घेत अटक करण्यात आली. पुढील तपासकामी त्याला जिल्हापेठ पोलिस स्टेशनच्या ताब्यात देण्यात आले आहे.
