जळगाव ( प्रतिनिधी ) – शहरातील गेंदालाल मिल परिसरातील रहिवाशी शंकर निकम यांच्या संशयास्पद मृत्यूच्या चौकशीच्या मागणीसाठी त्यांच्या पत्नी आणि आई यांनी उपोषण सुरु केले होते या उपोषणाची दखल घेऊन जिल्हाधिकाऱ्यांनी चौकशी समितीची स्थापना केली आहे.
गेंदालाल मिल भागातील रहिवाशी शंकर मधुकर निकम यांचा 11 ऑगस्टरोजी शासकीय वैद्यकीय महाविद्यालय व रुग्णालयात चुकीच्या उपचारांनी झालेल्या मृत्यूची चौकशी होऊन संबंधित जबाबदार डॉक्टर व परिचारिका यांच्यावर गुन्हे दाखल करण्यात यावे या मागणीसाठी मयत शंकर निकम यांची आई श्रीमती सुमनबाई निकम व पत्नी श्रीमती रेखा निकम 20 ऑक्टोबरपासुन आमरण उपोषणाला बसलेल्या होत्या. त्यांच्यासोबत मयत शंकर निकम यांची 3 वर्षांची चिमुरडी मुलगी कनक देखील उपोषणस्थळी होती हे पाहून उपोषणस्थळावरील प्रत्येकजण संशयित डॉक्टरांबद्दल संताप व्यक्त करत होता.
या उपोषणकर्त्यांच्या म्हणण्यानुसार कै. शंकर निकम यांच्यावर चुकीचे उपचार झाले उपचारात अक्षम्य हलगर्जीपणा करण्यात आला मृत्यूनंतर त्यांच्या मृतदेहाचे दोन वेळेस पोस्टमार्टम करण्यात आले हे अत्यंत आक्षेपार्ह व संशयास्पद आहे .
या उपोषणाची दखल घेत जिल्हाधिकारी अभिजित राऊत यांनी मयत शंकर निकम यांच्या मृत्युची चौकशी करण्यासाठी समिती गठीत केली असुन समितीत शासकीय वैद्यकीय महाविद्यालय व काही खाजगी तज्ञ डॉक्टर्स यांचा समावेश राहणार आहे . समिती 8 दिवसात अहवाल सादर करेल व त्या अहवालात जे ही दोषी असतिल त्यांची गय केली जाणार नाही , कारवाई होईलच , असे लेखी व प्रत्यक्ष चर्चेत जिल्हाधिकारी राऊत यांनी आश्वासन दिले . गांभीर्याने व सहानुभूतीपूर्वक निकम कुटुंबीयांना मदत करून न्याय देण्यात येईल असेदेखील जिल्हाधिकाऱ्यांनी सांगितले.
उपोषणकर्त्यांच्या वतीने छावा मराठा युवा महासंघाचे जिल्हाध्यक्ष अमोल कोल्हे , मंगल भालेराव , श्रावण अहिरे , संजय निकम , भैय्या निकम , श्रावण सपकाळे यांनी जिल्हाधिकारी अभिजात राऊत यांच्याशी चर्चा केली. अमोल कोल्हे यांच्या हस्ते उपोषणकर्त्यांना सरबत देऊन उपोषण तूर्त स्थगित करण्यात आले . निकम कुटुंबियांना न्याय न मिळाल्यास छावा मराठा युवा महासंघ न्यायालयात दाद मागणार आहे .
