चाळीसगाव ;- तालुक्यातील हातगाव लघु पाटबंधारे तलाव क्र.२ च्या पाटचारी साठी जमिनी गेलेल्या हातगांव, अंधारी, तमगव्हाण, माळशेवगे या गावांमधील शेतकऱ्यांचा प्रलंबित असलेला भूसंपादनाचा मोबदला मिळण्यासाठी भूसंपादन अधिकारी तथा उपविभागीय अधिकारी, चाळीसगांव यांनी भुसंपादन प्रस्ताव क्र.४७/२०१५ अन्वये अंतिम मोबदला रक्कम उपलब्ध करुन देणेबाबत रक्कम रु.२.४५,९६,१६८/- चा निधी मागणी प्रस्ताव लघु पाटबंधारे विभागाकडे पाठवला होता मात्र शेतकऱ्यांनी अनेकदा पाठपुरावा करूनही त्यांना सदर मोबदला मिळत नसल्याने त्यांनी चाळीसगाव तालुक्याचे आमदार मंगेश चव्हाण यांच्याकडे धाव घेत आपली समस्या मांडली.
आमदार मंगेश चव्हाण यांनी शेतकऱ्यांच्या समस्या जाणून घेत तात्काळ शेतकऱ्यांसोबत तापी पाटबंधारे विभागाचे कार्यकारी संचालक यांची ऑक्टोबर २०२० मध्ये जळगाव येथील कार्यालयात भेट घेऊन शेतकऱ्यांचे गाऱ्हाणे मांडले होते. परंतु शासनाने निधी नसल्याचे कारण सांगत त्यासाठी पाठपुरावा सुरु असल्याचे कार्यकारी संचालक यांनी त्यावेळी सांगितले होते. त्यावेळी आमदार मंगेश चव्हाण यांनी सांगितले होते की अनेक वर्षांपासून सदर प्रकल्पाच्या पाटचारी साठी या शेतकऱ्यांनी आपल्या जमिनी दिल्या असून जर त्यांना त्यांच्या हक्काचा मोबदला मिळण्यासाठी सरकारी कार्यालयाच्या फेऱ्या माराव्या लागत असतील तर लोकप्रतिनिधी या नात्याने मी यासाठी वेळप्रसंगी कठोर भूमिका घेईल असा इशारा देखील त्यांनी दिला होता.
अखेर आमदार मंगेश चव्हाण यांच्या पाठपुराव्याला यश मिळाले असून हातगाव तलाव – २ च्या भुसंपादन प्रस्ताव क्र.४७/२०१५ मधील शेतकऱ्यांचे प्रलंबित २ कोटी ४५ लक्ष ९६ हजार रुपयांचा धनादेश वितरीत केल्याचे दि.६ एप्रिल २०२१ रोजीचे कार्यकारी अभियंता, लघु पाटबंधारे विभाग, जळगाव यांचे पत्र चाळीसगावचे उपविभागीय अधिकारी यांना प्राप्त झाले आहे. त्यानुसार सदर हातगांव ५२, अंधारी ४६, तमगव्हाण १३, माळशेवगे ३२ अश्या एकूण १४३ शेतकऱ्यांना हा मोबदला मिळणार आहे. आमदार मंगेश चव्हाण यांनी पुढाकार घेत आमची अनेक वर्षांपासूनची मागणी स्वतः वैयक्तिक लक्ष घालून पूर्ण केल्याबद्दल सदर लाभधारक शेतकऱ्यांनी त्यांचे आभार मानले आहेत.
